Campagne grame

«Un-a vira ij nòss vej a disìo che, quand l'anada andasìa mal o la tempesta a triava tut ël sëmnà, a-i ero temp ëd campagne grame». E «Campagne grame», con l'arferiment ai di che as vivo ancheuj, a l'ha antitolà sò ùltim Cd l'Ariondassa, un grup musical motobin an piòta che a nass dël 1998 da l'union ëd quat musicista «stòrich» dël fòlch piemontèis: Vincenzo «Chacho» Marchelli, Lorenzo Bojoli, Rinaldo Poro, Simona Boglia. Còs as peul fé an temp ëd campagne grame për tiré anans la barsiga? Lòn ch'i soma fé mej, a rispond l'Ariondassa «canté e soné la mùsica dël nòss paìs, dla nòssa tèra». Për costa fòrsa 'd jer, d'ancheuj, ëd doman, anlora varda sì cost bel cd ch'ancamin-a con na poesìa 'd Giovanni Rapetti musicà da Rinaldo Doro, «Piva e Ghironda 'd Tani di Ribelli»; për continué con «La guerriera», 'l «Disertore», «Il Mòro Sarasin», «La pastora e il lupo», «Bel Uzelin», e d'àutre dla tradission popolar; e ancora «Ombre» 'd Nino Còsta, musicà sempe da Doro, për finì con «Tentazione, Giga di Milwaukee, për Bobby», ch'a sarìa Bobby Tanzilo, un piemontèis 'd Merica, ch'a l'ha colaborà a la plachëtta ch'a compagna 'l cd con le tradussion an inglèis dij test, che a son an piemontèis (soagnà da l'Ass. Ël Sol dj'Alp) e an italian. An tut ondes tòch da sente, da canté, da subié ansema, spetand e sperand campagne bon-e. A son-o e a canto: Emanuela Bellis, viòla dij bòrgno (ghironda); Lorenzo Bojoli, flute, ocarin-a, sax, musette; Sonia Cestonaro, oboe, arpa, ocarin-a, flute; Rinaldo Doro, armonium, organèt; Vincenzo «Chacho» Marchelli, vos solista, froja; Andrea Peasso, contrabass (o crin-a); coma «ospiti», Aldo Mella, ciochin, cosse, grancassa, sonaj, tamborn; e Maurizio Verna, froja classica a des còrde. Per trové 'l cd, e gòdse un pòch ëd costa bela mùsica (rangià e soagnà da Sonia Cestonaro, Rinaldo Doro e Andrea Peasso) a venta ciamelo a le Edission Musicaj «FolkClub Ethnosuoni», ch'a l'è a Casal Monfrà (Lissandria) an via dËl Dòm 3, tel. 0142/78.21.82 (ridoro@tiscali.it). E n'anvit a j'istitussion: përchè a Turin a ven-o mai ciamà ant j'ocasion ëd festa 'd mùsica popolar ij tanti grup ch'a canto e a son-o, bin, an piemontèis? E-lo che lòn ch'a l'è an piemontèis (ant soe diverse cadense) a l'è comsisìa considerà 'd serie B? Opura mach grassa ignoransa? Ant ël nòst cit i continueroma (bogianen teston e anbalinà) a segnalé viaman tuti ij cd che an ven-o mandà. Bat e arbat...chi lo sa che prima o peui miraco fin-a ij ciòrgn e ij bòrgno... d'Albina Malerba - dal Vënner ëd La Stampa dij 2 d'avril dël 2010

Indietro