«Studi Piemontesi», 1-2010

A l’é surtìe «Studi Piemontesi», 1-2010, l'arvista dla Ca dë Studi Piemontèis ch'a l’é rivà (doi nùmer a l'agn) a tranteneuv nùmer. Për n'arvista 'd coltura a l’é pa pòch. Con soe bele pagine da tajé (gust che cheidun a meprisa, përchè a riess nen a capì coma an cost temp 'd còse ch'a viagio an pressa as peussa 'ncora insiste a 'ndé pase e adase: e bin le pagine a l’é bel tajessie pròpe për sòn, për dì che na resistenza cita as peul cudisse 'dcò 'n costa manera ch'a gropa blëssa dla pagina e piasì 'd tochene la consistenza, dë spetene e, squasi, nasene ‘l sens). Nùmer - come sempe - s-ciass e divers. Argoment dë stòria, d'arte, 'd literatura, stude, nòte, ritrat, arcòrd, inédit, recension segnalassion, un notissiare ch'an conta dle tante inissiative pijà da la Ca dë Studi, ma 'dcò da tante d'autre associassion o famije o grup o përson-e ch'a travajo an nòsta region. N'arvista bin conossùa, ma ch'a sarìa bel che tuj a conossèisso përchè daré a-i é n'anima ch'a la possa e ch'a la buta minca ses meis a l'onor dël mond (ël diretor a l’é Luciano Tamburini, a deje 'n gròss agiut Albina Malerba e Giulia Pennaroli con la colaborassion d'un fiamengh grup dë studios 'd diverse materie}. An cost nùmer sì tante man (Gustavo Mola di Nomaglio, Italo Pennaroli, Roberto Sandri-Giachino e Fulvio Peirone) për contene come Turin a l'abia vivù la cession dla Savòja e 'd Nissa a la Fransa. E peui, mëssonand an sa e an là, Luigi Rocca e Edmondo dë Amicis (Gian Luigi Bruzzone), na riprodussion dla Sindone sparìa dal Sacro Monte 'd Varal (Casimiro Debiaggi), barcaireuj an sël Po, vis a dì, la famija Clerico ant ël Sessent, un bel ritrat 'd Francesco Carandini (Donato D'Urso), citi arcòrd ëd Giorgio Vaccarino (Rosanna Roccia), Eugenio 'd Savòja con ëd neuv document da j'Archive 'd Vienna {Sara Comoglio) e la galuparìa ansima al lessich piemontèis (da «arbënna» a «taravela») che Anna Cornagliotti - arcordand Pare Gasca Queirazza - a buta ansema con l'agiut ëd chèich studios. Ch'a sia la vota bon-a për dé fora coma as deuv un dissionare etimològich dël piemontèis? E peuj, come sempe, le tante recension, le tantissime segnalassion d'atività, d'ancontr, ëd moment ëd coltura an Piemont. Chi a l'abia intension d'abonesse, basta fé na telefonà e anformesse a la Ca dë Studi (011/537486; info@studipiemontesi.it). ëd Giovanni Tesio - dal Vënner ëd La Stampa dij 10 dë stèmber dël 2010

Indietro