La vòta bon-a?

Vàire vote l'omna arpetulo? Ij piemontèis che ancheuj an Piemont a san ancor parlé piemontèis a son a peu pre 2 milion; e che pi d'un milion a diciara 'd capilo. Ma da sì 10, 20 ani? A l’é element ch'a duvrìa porté ij nòsti aministrator a 'nteroghesse sla chëstion ëd la lege regional për la tùa e la valorisassion dla lenga piemontèisa, crasà da la Consulta, ch'a sarìa tòst ora d'esse arpijà an man. Antant la bon-a neuva a l’é che possà da la bela manifestassion për ël «piemontèis ufissial» tnusse un meisòt fà për angage dl'associassion «Gioventura Piemontèisa», ch'a l'era sarasse con la consigna 'd na propòsta d'Ordin dël di al Consèj Regional, dòp che na delegassion dl'associassion a l’é stàita scotà dal Pressident dël Consèj, a l’é surtìe un comunicà stampa dël Consèj Regional ch'a anforma su l'Ordin dël di, sotsignà dal Vice President dël Grup regional dla Lega Nord Michele Mannello, e da la Consijera dël Partì Democràtich, Angela Motta, che arciamandse al gran nùmer dij piemontèis ch'a-i ten-o a soa lenga, al fàit che ‘l piemontèis a l'ha na soa koinè literaria e na tradission secolar ëd pròsa critica, narativa, poetica e scientifica; che 'l piemontèis a dispon d' «un cospicuo corpus letterario, il cui primo documento scritto a noi pervenuto (ventidue prediche di alto contenuto religioso risalenti al XII secolo) rivelano l'uso di una lingua già completamente elaborata»; che ‘l piemontèis a l’é arconossù coma lenga dai pi amportant studios (nòst pensé a va a le bataje e a l'angage dël professor Gianrenzo P. Clivio e dlë scritor Tavo Burat), da L'Unesco e dal Consèj d'Europa; ma che ‘l piemontèis an cost moment a l’é nen arconossù coma lenga da lë Stat italian, «fatto che costituisce una palese discriminazione della maggior parte dei cittadini piemontesi» e për conseguensa a manca «un quadro legislativo di tutela che, solo, può permetterne la conservazione e lo sviluppo»; donca për ranché via costa discriminassion, ch'a l'ha gnun-e lògiche sientìfiche, l'ordin dël di ampegna la «Giunta regionale a intervenire presso il Governo e il Parlamento della Repubblica» përchè le diverse propòste 'd lege an cost sens deposità sia a la Camera che al Senato, a sio «discusse e approvate parificando la lingua piemontese alle altre lingue minoritarie già tutelate dalla legge 15.12.1999 n.482». Dòp 11 ani d'ingiustissia, ch'a sia la vòta bon-a? d'Albina Malerba - dal Vënner ëd La Stampa dij 26 ëd novèmber dël 2010

Indietro