Turin e Piemont travers la canzon

A-i é 'n lìber ch'i l'oma mai recensì e ch'a l’é bel ch'i na parlo, përchè - combin ch'a sia scrit an italian - a l’é pien ëd còse an piemontèis. Ël lìber a s'ëntitola «Dalla città, le montagne» (sot-tìtol: «Torino e Piemonte attraverso la canzone»). A l'ha scrivulo Isabella Maria Zoppi (e a l'han colaborà Franco Castelli e Alessio Lega). A l’é publicà da l'editor furlan (Udine) ch'a së s-ciama nota Cd Book 640 (pp. 304, euro 20), grassie 'dcò a l'Università dë Studi 'd Turin, Dipartiment dë Siense dël lengage e Literature moderne e comparà. Un bel volum ch'a va an serca 'd lòn ch'a fà Piemont a travers dle canson ch'a l'han cantà region, an italian e an piemontèis. Canté ‘l paesage, canté stòria e na frisa 'dcò felà, canté confin, canté Turin, canté la tera, canté la gent, canté con ironia e sentiment, canté sotvos e fòrt. E antlora vard-je sì le face e le vos e le paròle dij protagonista: da Pestelli a Lega, da Zoppi a Testa, da Liberovici a Amedei, da Chiosso e Buscaglione ai doi Conte, da Pogliotti a Gipo, da Emilio Jona a Michele Straniero, da Stefano Giaccone a Lalli, da Enzo Vacca a Roberto Balocco, dai Tre Lilu ai Mau Mau, dai Subsonica ai Lou Dalfin e via fòrt (na lassoma fòra na bela partìa). A val la pen-a - mi penso -'d dì doe còse: prima 'd tut la richëssa dle vos che ‘l Piemont a l'ha dàit a la canson italian-a e magara pi local ma 'd sicur nen da pòch. E peui l'abondansa dij test che Isabella Maria Zoppi (a-i é 'dcò 'n cd ch'a compagna sò lìber) a pia an considerassion andasand an serca dle arsonanse pi sutile e dle vos pi goregne. A basterìa l'esempe 'd Pòrta Palass. Dai Mau Mau 'd «Balon Balon Balon/ Balon Balon combo!» al Gipo pi forti: «co’ ij sò mercà quatà/ Pòrta Pila a smija mòrta/ e mi canto magonà:/ Pòrta Pila, Pòrta Pila,/ la gioventù, sensa sagrin,/ Pòrta Pila, Pòrta Pila,/ adess l’é mach pi 'n seugn lontan». Tra canson popolar e canson d'autor, citi s-cianchèt d'un lìber ch'a fa bel lese (e scoté). ëd Giovanni Tesio - da TORINOsette dla Stampa dël 3 dë dzèmber dël 2010

Indietro