Vijà piemontèisa 2010

A l'era anandiasse quasi për azar ant lë dzèmber dël 1998, al Teatro Carignan, la «Vijà piemontèisa», peui ant j'ani a l'ha arzistù, ‘l pùblich a l’é slargasse, a l'ha dovù cambié vàire vire teatro, ma a l’é dventà un randevó ch'a fa tradission, ch'a fa festa, che la gent a speta, come tute le ròbe sempie e bele. Vijà, «veglia», na «notte bianca» d'antan, na vijà për speté ‘l Natal con le vos dla poesìa che da sécoj a parla an lenga piemontèisa, ch'a veul 'dcò esse na festa dla speransa, dl'arcòrd, dla continuità e dla arnassensa, sicur che le paròle a son nen mach segn o fià, ma a l'han n'anima e na stòria antica, ch'a fongo soe rèis ant ël sit profond dl'esistensa uman-a. Dòp tërdes ani, st'ani la Vijà a l'era lì lì për tiré ij caussèt, për mancansa 'd dné, ma j'ator, ij musicista, le Compagnìe che ant j'ani a l'han compagnane a l'han dàit sò angagi për gnente, a gratis, për ël Piemont. Anlora për saré ansema a la piemontèisa 'l 2010 e fesse j'auguri, la Vijà «poesìa e mùsica për Natal» as fà, organisà da la Ca dë Studi Piemontèis al Teatro Collegio San Giuseppe (via Andrea Doria 18, Turin), saba 18 dë dzèmber, a 5 ore dël dòp disné. Përchè as sapia che ‘l Risorgiment a l'ha parlà pi che tut an piemontèis, la vijà a l’é dedicà a «Angelo Brofferio. L'onorevole cantautore dël Risorgimento». Scotroma dai mèj ator ch'a san parlé la lenga piemontèisa: Crudel dëstin, Ël bòsch ëd Vignòle, Mè can, Sor Baron, La Carafin-a rota, La Barchëtta, Ij Buratin, Mè at ëd fede, Spirit Folèt, Mè ritorn, La Piemontèisa, L'abolission dij convent, La Stèila dël Piemont, Ij Bogianen e via fòrt; e për resté ant lë spìrit natalissi as sara con «La Neuit Santa» 'd Guido Gozzano e la poesìa «Natal» ëd Renzo Gandolfo ch'an compagna da la prima edission e an pòrta boneur. A recito, a canto, a son-o, a parlo: Danilo Bertazzi, Rosalba Bongiovanni, Domenico Brioschi, Mario Brusa, Adolfo Fenoglio, Bruno Gambarotta, Pier Giorgio Gili, Giovanni Moretti, Fulvia Roggero, Giorgio Serra, Massimo Scaglione, Enzo Vacca, Marco Voerzio, e magari d'àutri as gionteran. La Vijà a l’é gratis, e as peul intresse fin-a ch'a-i son ëd pòst an Teatro. Për d'àutre anformassion basta telefoné al nùmer 011/53.74.86 (info@studipiemontesi.it) opurament (www.studipiemontesi.it). d'Albina Malerba - TORINOsette dla Stampa dël 17 dë dzèmber dël 2010

Indietro