L’Armanach dij Brandé

A torna bin pontual (vista la stagion, as dirìa come Gelindo) l'armanach ëd poesìa piemontèisa «Ij Brandé». N'«armanach leterari» soagnà da Michel dij Bonavé (në scartari 'd novantequat pagine gropà come suplement a l'arvista «Piemontèis ancheuj»), ch'a 'n compagnerà për tuta l'anada dël 2011: cola - ma a lo san fin-a le pere - ch'a fa sentesinquanta da l'Unità. A-i sarìa sùbit da dì che ij temp a son cambià nen pòch se un-a dle arsorse d'ancheuj a ven-o squasi pi da fòra che da Turin. Ant un ane aniversari la costion a smijrìa dròla s'a fùissa nen ch'a l’é mach giusta: ant ël sens che la stòria a bogia e le lenghe e le prospettive a l’é giust ch'a cambio. Veuj mach dì che ambelessì Michel dij Bonavé a fortiss d'esse content dle vos neuve ch'a ven-o da lontan, visadì, da la provincia dël Verban-Cusi-Òssola opurament da la provincia 'd Lissandria, che tutun a l’é pi vsin-a combin ch'a sia 'd finage come l'àuta. Da sì e da là, comsissìa, bon-e neuve. Massimo M. Bonini a manda dëd sò e Sergi Gauss a fa soa part gavand da na tesi 'd laurea discutùa a l'Università dël Piemont Oriental. Vos neuve e nòm neuv ch'a deurvo j'ëspassi dël piemontèis e a fan un consert bin pi spantià 'd col ch'a së stimava gnanca tanti agn fa. E donca, bon-e neuve. Bon-e neuve ch'a ven-o a combinesse con le neuve «veje» ch'a son nen meno bon-e. E antlora vardje sì ij nòm ëd sempe. Prima coj dla tradission: da Badalin a Blin, da Nino Costa (n'inédit!) a Tavio Cosio, da Olivero (n'àut inedit?) a Bianca Dorato, da Pinin Pacòt a Alfredo Nicola. Peuj j'àutri ch'a son coj ch'a fan la mùsica 'd si agn sì: da Pinuccia Gamba a Rico Gulin, da Sergio Notario a Dario Pasero, da Maria Carla Ottazzi a Silvio Viberti, da Valerio Rollone a Gianfranco Pavesi (e na lasso fòra tanti con la fiusa ch'a 'n veulo nen mal për sòn). An toca dì për completèssa ch'a-i é prima 'd tut na session d'intervent divers ch'a van da na pagina 'd Burat (na presensa ch'a 's peul nen dësmentiesse) a un-a 'd Censin Pich sla proclamassion dël Regn d'Italia e la mòrt ëd Cavour, da na pagina 'd Giusep Goria su Gioann Bono a un-a 'd Pasero su Nino Morano. E a la fin 'dcò le pagine 'd pròsa, da Maria Coda Forno a Carlin Porta, da Candida Rabbia a Vittoria Rollè. Pagine da ten-e bon-e për ancheuj e për tut l'an. ëd Giovanni Tesio - da TORINOsette ëd La Stampa dij 14 ëd gené dël 2011

Indietro