Studi Piemontesi

A l’é surtìe «Studi Piemontesi», l'arvista dla Ca dë Studi Piemontèis ch'a l’é rivà - an costi temp gram e gramis-cio - a tranteneuv agn ëd vita. Con soe bele pagine da tajé (lo disoma sempe: gust che cheidun a meprisa, ma che a rapresento na cita resistenza a la pressa, anvitand a la blëssa 'd toché la pagina col piasì dla consistenza dla carta e con la gòj dij caràter e dla gràfica: nen còse da pòch). Nùmer - come sempe - satì e divers. Argoment dë stòria, d'arte, 'd literatura, stude, nòte, ritrat, arcòrd, inédit, recension segnalassion, un notissiare ch'an conta dle tante inissiative pijà da la Ca dë Studi, ma 'dcò da tante d'àute associassion o famije o grup o përson-e ch'a travajo an nòsta region. N'arvista bin conossùa, ma ch'a sarìa bel che tuj a conossèisso 'd pi përchè daré a-i é n'anima ch'a la possa e ch'a la buta minca ses meis a l'onor dël mond (apress dla mòrt ëd Luciano Tamburini, ch'a l’é Albina Malerba a arcordé belessì, a farà da diretriss Rosanna Roccia, na studiosa fin-a fongà dël nòst Risorgiment e dl'«Epistolario» 'd Cavour, ch'a l’é stàita për tanti agn diretriss dl'Archivi dla sità 'd Turin). An cost nùmer sì tante man (Andreina Griseri, Pier Massimo Prosio, Gianni Bozzo, Renata Allio, Silvia Beltramo, Piero Gondolo della Riva, Daniela Biancolini...) për contene come a s'antërso colture e langage a la Cort dij Savòia, come Chateaubriand a sia passà da Turin, come serte atribussion dël Cairo, dël Guercino, dël Subleyras a passo tra Turin e Milan, come Cavour a l'abia riformà l'agricoltura, come a l'era la residenza dël castel ëd Casòt a la metà dl'Eutsent, 'd come ant ël passà a s'inmaginavo l'avnì. Mëssonand an sà e an là, Rosanna Roccia ch'an parla 'd Santena, Giuseppe Talamo dl'«Epistolario» 'd Massimo d'Azeglio cudì da Georges Virlogeux, Fabiana Borla 'd Felice Cervetti, un pitor a la Consolà, Felice Pozzo dël misteri dël fij d'Augusto Franzoj, gran viagiator, Maria Teresa Reineri dle lesen-e ricamà dël Carmelo 'd Moncalé; studi 'd toponomastica d'Alda Rossebastiano. Për nen dì ij document e j'inédit da Franco Antonicelli a Tancredi Canonico, da la comunità 'd j'ebrei a Lissandria a na mapa 'd Teston-a dël 1708. E peuj, come disìo, le tante recension, le tantissime segnalassion d'atività, d'ancontr, ëd moment ëd coltura an Piemont. Chi a l'abia intension d'abonesse, basta fé na telefonà e anformesse a la Ca dë Studi (011/53.74.86; info@studipiemontesi.it; www.studipiemontesi.it). ëd Giovanni Tesio - da TORINOsette ëd La Stampa dij 28 ëd gené dël 2011

Indietro