Remigio Bertolino

Da «Mia mare» (1976) a «L'eva d'ënvern» (1986), da «Sbaluch» (1989) a «A lum d fiòca» (1995), da «Ij sègn dl'Apocalisse» (1998) a «Ël vos» (2003), da «Stanse d'ënvern» (2006) a j'inedit ch'a son nen pòchi (miraco, quatòrdes). Tut sòn a l'é la sèrnia dle poesìe 'd Remigio Bertolino ch'a l'ha cudì Giorgio Bàrberi Squarotti për le edission «puntoacapo» 'd Novi Ligure (www.puntoacapo-editrice.com), tìtol «Versi scelti 1976-2009» (pp. 212, euro 18). Poesìe scrite ant la parlada 'd Montàud dël Mondvì, 'n pais ëd (bassa) montagna 'nfilà tra 'l Corsaja e 'l Ròburentel. A bastrìo ij tìtoj a mosté 'l mond ëd Bertolino, un dij poeta lìrich pì conossù dij nòsti dì: «lumin», «lum», «sbaluch», ma 'dcò «ënvern», ma 'dcò «fiòca», ma 'dcò «eva» («eva» come temp verbal, vis a dì: «a l'era», e «eva» për dì «eva», «acqua»). Un mond bianch e luminos, un mond pòver e misterios. Povertà 'd còse e 'd paròle, gest patanù, stagion e mese stagion, mësté, esistense, passaggi, uss, sèire, neuit, arciam, presense d'angej, creature an serca 'd sò gnente e 'd sò tut. Gnun-e nostalgìe, ma la precision dij temp e dij pòst ch'as fan temp e pòst d'andrinta, che a travers la natura a vardo la vrità ch'a gita, ch'a buta: «vos» përdue ant l'aria, ant le èire, ant le cort, an sle lòse dij tèit, ant le ca bandonà, ant le frà, ant ij foalé, ant le splùe, ant le faravòsche, daspërtut, përchè tut a l'é passà e a l'ha lassà soe pianà, a l'ha lassà na trassa. «Dëstin ëd pòvre còse,/ëd pòvri òmi» che 'l poeta a sa cheuje linger, fòrt ëd soa memòria e 'd soa vita. Le vos ëd Bertolino a son le vos d'un mond d'andrinta ch'a l'é 'l poeta a portesse daré. Vos ëd na vos ch'a possa e che possand a-j dà vita a la vita. Përsonage d'un presepio ch'a varda dëdlà o dritura ch'a ven dal dëdlà. Rosare, càmole, grij, frisson, squiss, sofe, respir. Un mond ëd paròle pòvre traversà da la lus ch'as fa poesìa. Ant la misura d'un Vermeer paisan tuta la fòrsa 'd na lenga stërmà, tuta la blëssa 'd sa sèrnia ch'as finirìa mai 'd lese e 'd'arlese. ëd Giovanni Tesio - da TORINOsette ëd La Stampa dj'11 ëd fërvé dël 2011

Indietro