Vìsite guidà a Turin an vàire lenghe

Ij primi ch'a l'han ancaminà a pensé d'anvité ij turinèis e ij piemontèis a torné a visité ij pòst ëd soa stòria, le cese e ij Museo, proponend ëd «visite guidate» an lenga piemontèisa, a son stàit coj dla Basilica 'd Superga, e 'dcò st'ani a propon-o n'ancontr për stagion, un-a a l'han fala a fërvé, j'àutre a saran a magg, a luj e a stèmber (ciamé 'l programa al nùmer 011/899.74.56). N'àutra propòsta an ven dal Museo Pietro Micca, che a l'ha ancaminà 'l 16 ëd mars passà con la neuit tricolor, e ògni prim saba dël mèis a 4 ore dël dòp mesdì a s'arnoverà, con ël proget «Pietro Micca: un piemontese... in Piemontese», visite al Museo con le Guide Volontarie ch'an compagneran an lenga piemontèisa (ciamé anformassion e prenotesse al nùmer 011/54.63.17, o andé an via Guicciardini 7/a). E a l'é bel che coste atension a ven-o ant la carsà dij 150 ani dl'Unità d'Italia, përchè i l'oma avù diverse letere 'd protesta, i citoma cola 'd Monsù Pignatelli, ch'an ciama 'd sotligné «nòsta indignassion anvers a coj ch'a stan butand-su le feste dël 150...sensa la lenga piemontèisa! A l'é con la lenga piemontèisa che...a l'han modlà l'Unità! Altro che stòrie». A cost propòsit a va butà an evidensa l'inissiativa dël Borgh Medieval, che da mars a novèmber a l'han organisà 'l proget «I dialetti raccontano il Borgo Medievale. Visita nelle lingue d'Italia», për ij turinèis e për ij turista ch'a ven-o da àutre part d'Italia. A s'ancamin-a saba 19 ëd mars a 3 bòt e mes con la visita an lenga piemontèisa soagnà da Pino Perrone; e peui as andrà anans tuti ij saba, sempe a 3 bòt e mes, ògni saba con na lenga diversa, valdostan, lombard, puglièis, calabrèis, veneto, sicilian, campan, «altoatesino», e vàire 'ncora an piemontèis. An costa manera 'l Borgh Medieval (un dij pòst pì visità 'd Turin) a veul dé na man a valorisé le lenghe regionaj che «con la loro ricchezza contribuiscono, oggi come nel 1861, alla cultura del nostro paese». Dacant a le visite a-i saran 'd moment folclorìstich, gastronomich, video, lìber e materiaj dla coltura dla region ch'an farà vëdde 'l Borgh con soe paròle. A në smija na bela lession për coj tanti che për garghìssia a penso che ant le lenghe cite as peussa mach fé grigné! Për anformassion vardé 'l sit (www.borgomedievaletorino.it), opurament telefoné al nùmer 011/443.17.01. d'Albina Malerba - da TORINOsette ëd La Stampa dij 18 ëd mars dël 2011

Indietro