Salon antërnassional dël lìber

Un còti sofion ch'a dësbandiss soe piumëtte al vent: a l'é l'ansëgna dël tema (che noi voltoma an piemontèis) «Memòria. La smens dl'avnì», dël Salon antërnassional dël lìber Turin ch'a fa 24, e che da ier fin-a al 16 ëd magg a l'é la pì granda giojera 'd lìber d'Italia. La novità 'd costa edission a l'é che për la prima vira as deurb ai lìber l'Oval, dova a-i sarà l'esposission «1861-2011. L'Italia dei libri», tra ij 150 lìber che pì a l'han marcà costi 150 ani i troveroma 'dcò «Le miserie 'd Monsù Travèt» ëd Vittorio Bersezio. L'aùtra novità, da fòra, a l'é che st'ani as podrà rivé al Lingòt con la Metro: bela comodità. Da armarché che ant l'Oval ël Consèj Regional dël Piemont, ant sò Stand W18-X17, ëdcò st'ani a dà vos a le «Parole di Piemonte». An piassëtta «Parole di Piemonte», vënner 13, a 4 e mesa dël dòp disné, presentassion dël bel sacociabil dedicà a «Parole di Piemonte 1861-2011», e peui a 6 ore a toca a la lenga piemontèisa, con Dario Pasero, Albina Malerba, Davide Damilano e Giovanni Cerutti e soa fisa. A 8 ore 'd sèira a-i sarà, come për tute le sèire, lë spetàcol dle marionëtte d'Augusto Grilli. Saba 14, a 6 ore, a toca al francoprovenzale, duminica 15, sempe a 6 ore, ai Walser e për finì lùn-es 16, a 6 ore, j'Ocitan. Coma i l'oma dit vàire vire, 'l Salon a l'é sempe n'ocasion për andé a la sèrca dj'editor pì cit, e 'd coj ch'a l'han an catalògo euvre an piemontèis malfé trové ant le librerìe. Tra ij pì che 1500 editor present i na segnaloma chijdun ch'a pùblico ëd lìber an piemontèis: Viglongo (Pad. 1 Stand F 46), Centro Studi Piemontesi/ Ca dë Studi Piemontèis (Pad.2 Stand K04), Artistica Editrice (Pad.2, L01), Neos Edizioni (Pad 1, F 22), Graphot (Pad. 1 E 52), Alzani (Pad 2, N67), Daniela Piazza (Pad 2 G 49), Priuli e Verlucca (Pad 2, L52), Il Punto-Piemonte in Bancarella (Pad 3, S10), Interlinea (Pad 3, S 71), Savej (Pad 2, K 17), Piemontelibri, la Librerìa dj'editror piemontèis (Pad 3, R 130). d'Albina Malerba - da TORINOsette ëd La Stampa dij 13 ëd magg dël 2011

Indietro