Fàule, conte e legende dla tradission popolar piemontèisa

A s'ëntitola parèj un libròt da doi sòd ch'a peul fé la gòj dij grand e dij gognin: «Fàule, conte e legende dla tradission popolar piemontèisa». A conté doi magister dla literatura piemontèisa, Camillo Brero (Milo Bré) e barba Guido (vis a dì Guido Musso). A soagnelo Michele Bonavero (Michel dij Bonavé) ch'a l'é un dij pì angagià ant ël mond dij piemontesista. A publichelo l'Editrice Il Punto-Piemonte in Bancarella (pp. 208, euro 6) ch'a continua soa atività con corage e cognission. Libròt an piemontèis e an italian. Un libròt ch'a pudrìa 'dcò mnì a taj për amprende 'l piemontèis, përchè a l'é scrit bin come pòchi, ma 'l gust dla paròla d'antan a ciapa nen pì che cola d'ancheuj e tut ansema 'l son ch'a-j na ven e l'é 'n son s-cet e pien ëd deuit (ant ël cas ëd barba Guido i dirìa fin-a 'd giget, përché Brero a l'é pì gropà a 'd noanse còtie, meno barivele e dësgagià). Ant la diferensa dij ton e dle arsonanse a l'é pro 'n bel concert col ch'a fan l'un e l'àut con la sapiensa e la siensa dle pàuse e dle paròle giuste. A smija dë sté lì a scote-je doi giovnòt ëd longa vita. Brero an conta dla creassion dij piemontèis «con la testa an sël còl»; an conta dël merlo dal bech giàun (bela cola stèila granda «con na coa lusenta ch'a colava soa lus ansima a le lòse dla balma»); an conta dla balma 'd Gilindo e dle piante e dël vent e dla Befana e 'd Michel dla Ròca, ch'a smija «un fortin dij soldà». Barba Guido an conta dël luv e dla crava, d'un chèr d'òr e 'd na cagnëtta, dla masca dël Famàu (un bòsch da le part dla Langa 'd San Benedèt) e dij fieuj dël muliné, dla lonza e dël gramon (an ven an ment Tavio Còsio) e dla tërsa e dël magnin, ëd Tèit Sarvan e 'd Petin Menin, squasi un clàssich. Tut ansema n'aria 'd festa e dë sbaluch. E mi ch'i j'era daré dl'uss gnanca dame na ciapa 'd pruss... ëd Giovanni Tesio - da TORINOsette ëd La Stampa dij 17 ëd giugn dël 2011

Indietro