«Le paròle stërmà» ëd Bahá'u'lláh an lenga piemontèisa

A chi a continua a pensé che avèj a cheur na lenga cita, avèj passion për la lenga 'd nòsta tèra a sìa na manera d'aussé muraje, e nen avece a la fin pròpe 'l contrare!, i dedicoma la segnalassion d'un lìber che darmage a l'é sircolà pòch. La Comunità Bahá'i 'd Turin a l'ha publicà na grassiosa edission an lenga piemontèisa dle «Parole celate» 'd Bahá'u'lláh (già tradot an pì che eutsent lenghe ant ël mond). La tradussion, publicà grassie a la concession dël «Bahá'i Publishing Trust» (Wilmette Illinois, U.S.A.), con ël tìtol «Le paròle stërmà» a l'é 'd Davide Damilano, che ant la «Nota del traduttore» a esprim la gòj ch'a l'ha daje l'angage 'd podèj rende ant la lenga dij sò, costi Scrit Sacr d'un mond lontan. La prima part a l'é da l'arab «Chiel a l'é la Glòria dle Glòrie», la sconda «Ant ël nòm dël Signor dël Lengagi, ël Tutpotent» dal persian. Gavoma doe citassion a pr'un, për rende al letor n'idea dla blëssa e dl'ausinansa spiritual. «Mè prim consèj a l'é costì: It l'abie un cheur pur, gentil e radios, përchè la toa a peussa esse na sovranità antica, ch'a finiss nen, ch'a dura për sémper»; «O mè frel! Daje da ment a le piasose paròle 'd Mia lenga dossa coma l'amel e dai Mè làver sucrin gavte la sej al ri dla santità mistica. Spatara la smens ëd mia saviëssa divin-a sël pur teren ëd tò cheur; e bagn-je con l'eva dla certëssa, parèj che le giassinta 'd Mè savèj e 'd mia saviëssa a dësbandisso vive e vërde 'nt la sacra sità 'd tò cheur». Dabon, coma a scriv Gianfranco Gribaudo ant l'Introdussion, «in un'epoca come la nostra quando sembrano più trionfare l'effimero e il superficiale, questa iniziativa della Comunità bahá'i di Torino non può non suscitare stupore». Un gest soasì che a sarìa bel che tanti turinèis a sentijsso coma un cadò da frej, un messagi 'd rispet dle diversità lenghìstiche e colturaj, un lìber da buté «fra le “buone letture” - a scriv Gribaud - quelle che scaldano il cuore». d'Albina Malerba - da TORINOsette ëd La Stampa dij 24 ëd giugn dël 2011

Indietro