Vijà piemontèisa 2011

A taja 'l traguard dij 15 ani la «Vijà piemontèisa»: a l'ha arzistù al temp, a le bùrie, ai sagrin, e a l'é dventà tradission. Sicur che le paròle a son nen mach segn o fià, ma a l'han n'anima e na stòria antica, ch'a fongo soe rèis ant ël cheur pì leugn dl'esistensa uman-a, la Vijà, na veglia, an men-a al Natal con le vos dla poesìa che da sécoj a parla an lenga piemontèisa, e ch'a veul 'dcò esse na festa dla speransa, dl'arcòrd, dla continuità e dla arnassensa. Parèj për saré ansema 'dcò cost dròlo 2011 e fesse j'auguri, la Vijà «poesìa e mùsica për Natal» as fa al Teatro Collegio San Giuseppe (via Andrea Doria 18, Turin), mersì al sostegn dël Consèj regional dël Piemont, duminica 18 dë dzèmber, a 3 bòt e mes dël dòp disné. A l'é soagnà e organisà da la Ca dë Studi Piemontèis (l'han dane na man Pier Giorgio Gili e Massimo Scaglione), st'ani con l'agiut - coma i l'oma dit - dël Consèj regional dël Piemont. La «poesìa» a sarà smonùa da j'ator Rosalba Bongiovanni, Mario Brusa, Giovanni Moretti, Fulvia Roggero, Giorgio Serra e Marco Voerzio, ch'a daran vos a Broferi, Calvo, Isler, Pacòt, Motura, Nicola, Nino Costa, Gianrenzo Clivio, Brero, Oreste Fasolo, Amilcare Solferino, Olivero, Alfonso Ferrero, Tavo Burat...e tanti d'àutri che con ij sò vers an faran rije, an faran sente la gòj dël Natal ch'a s'ausin-a e che as vivrà pì ancreus con la poesìa 'd Renzo Gandolfo «E Natal, l'é Natal / festa ciàira, lumen, / sensa temp, sensa màcie lontan- e / d'un ancheuj, che a smija 'n sempre, / la caden-a as fa scala/ për che i cheujo 'l boneur…», che come sempre a sara an còro la Vijà. A la poesìa as alterna la mùsica con Enzo Vacca e soa arpa celtica e Barbara Borra, vos, ant un recitalconsert «Teresa, na vita 'd tuti ij di», dedicà a Teresa Viarengo Amerio, l'informatris dël repertòri tradissional piemontèis registrà ant j'ani 1964-1965 da Coggiola e Leydi, registrassion goernà an Svissera, ant ël Fond Leydi dël Sénter ëd dialetologìa e d'etnografìa ëd Bellinzona. A la Viarengo, Enzo Vacca a l'ha dedicà ël cd «Un'arpa per Teresa», surtì da pòch da R&G Zedde. Vë 'nvitoma a vnì an tanti. La Vijà a l'é gratis, e as peul intresse fin-a ch'a-i son ëd pòst an Teatro. Për d’àutre anformassion: tel. 011/537486 (info@studipiemontesi.it; o: www.studipiemontesi.it). d'Albina Malerba - da TORINOsette ëd La Stampa dij 16 dë dzèmber dël 2011

Indietro