Giovanni Bono

A chi a l'ha na serta frequentassion ëd leteratura piemontèisa 'l nòm ëd Giovanni Bono (1901-1982), ‘d sicur a son-a nen forësté. Renzo Gandolfo a na scriv ant soa «La letteratura in piemontese dal Risorgimento ai giorni nostri» (1972), con paròle ch'an na dan d'amblé un cit ritrat poetich e uman: «Ha aderito tra i primi al movimento rinnovatore de Ij Brandé. Una innata signorilità - tipicamente torinese - ha sempre conferito alla sua poesia un tono intimo e garbato». E parèj a l'era la figura ‘d Bono. Mi im n'arcòrd quand con sò bel deuit as na rivava an ponta 'd pé a la Ca dë Studi Piemontèis, a smon-e a Gandolfo soe poesìe. E arcòrd ëd Bono i na trovoma su «Musicalbrandé» e su àutre arviste e giornaj piemontèis. Ma na vera biografia a-i era nen. Almeno fin-a a cost dzèmber 2011. Dòp ani e ani 'd travaj, 'd minussiose arserche d'archivi, Carlo A. M. Burdet (che a l'ha già fane cadò për jë scritor an piemontèis dë scuèrte fondamentaj) a pùblica adess nen mach na biografìa 'd Bono, con tuti ij crisma sientìfich, ma un «monument»: «Mio cugino Bono. Poeta torinese del Novecento» (Genesi editrice, pp. 586, € 40), con «102 testi letterari di Giovanni Bono trascritti e tradotti da Giuseppe Goria», con un «Atlante iconografico», e con doe prefassion, un-a 'd Giovanna Viglongo, «Un passato melanconico e piacevole nello stesso tempo», l'àutra 'd Camillo Brero, «Giovanni Bono o la dossa semplicità dël cheur!». Dòp n'overtura 'd Burdet, «Premessa sotto forma di lettera per Giovanni Bono», ël volum a l'é organisà an doe part: «La vita» e «La vicenda letteraria», con nòte e document ch'a fan ëd cost travaj nen mach na biografìa ma na «miniera» 'd documentassion, notissie, anformassion ëd coltura e siviltà piemontèisa, e na racòlta 'd materiaj për àutre «biografie» dë scritor e 'd poeta piemontèis tute da scrive. Da noté j'erbo genealògich e tra le vàire «Appendici», da sité «Giovanni Bono nella stampa periodica». E peui j'Indici: «Indice degli Autori e dei personaggi», «Indice delle Località», «Indice tematico». Giontomje ij 102 test leterari, poesìe e pròse, e 'l volume a l'é un model ëd travaj ch'a sarìa bel a fèissa carzà. Antant Burdet a l'é pront për l'euvra completa dle poesìe 'd Giovanni Bono. d'Albina Malerba - da TORINOsette ëd La Stampa dij 27 ëd gené dël 2012

Indietro