Giovanni Gianotti e Alfonso Ferrero

A-i é 'd poeta dla nòsta literatura an piemontèis che pòchi a l'han sentù nominé e che a sarìa bel che tuj a l'avèisso present. Stavòta am piasrìa nominene doi, che a son stàit considerà tra ij precursor dla poesìa dël Neuvsent: cola, tan për capisse, che tra Costa e Pacòt a stabiliss un neuv sentiment lìrich. Pì an Pacòt che an Costa, a dila tuta, ma sensa marché tra Costa e Pacòt na distansa ch'a l'é peuj nen sempe tan facil da stabilì (Costa a sentìa la diversità dla poesìa 'd Pacòt da la soa, ma a na sentìa bin la fòrsa neuva; Pacòt a savìa d'esse 'n poeta divers da Costa, ma a l'ha savù scotene la lession). Tutun, a fé 'l sàut vers ël Neuvsent - i disìa - a son stàit doi poeta come Giovanni Gianotti (1867-1947) e Alfonso Ferrero (1873-1913). Doi poeta che da na serta mira a l'ero part ëd cola che për comodità a l'é stàita ciamà la «generassion dël Birichin» (an vrità al «Birichin» a l'han colaborà poeta 'd pì che 'd na generassion). Da Alberto Arnulfi o Fulberto Alarni (1849-1889) a Oreste Fasolo (1864-1919), da Leone Fino (1861-1935) a Arrigo Frusta (1875-1965), ch'a colaborerà 'dcò ai «Brandé» 'd Pacòt, da Giovanni Gastaldi (1865-1914) a Alberto Viriglio (1851-1913) fin-a a Amilcare Solferini (1870-1929). A l'é stàit pròpe Pacòt - l'òm neuv - a arconòsse le pianà: «Gavà d'Alfonso Ferrero, da la produssion disuguala, ma soens ëd n'ispirassion àuta e potenta; gavà 'd certi moment delissios e dlicà d'un Fasolo o d'un Frusta, o 'd certe ecession ant ij vers un po' tërbol ëd Solferini; tut ël rest, soma sincer, as pudìa nen disse vera poesìa - coma ch'i la voroma adess - combin ch'a fuissa soens dë spirit e 'd gigèt, ëd bel deuit e 'd malissia». Ma 'dcò Costa a l'ha capì subiti ij temp ch'a parlavo divers quand che ant la presentassion dla prima euvra poetica 'd Pacòt, vis a dì «Arsivòli», a scrivìa për soa part che l'unica poesìa a fé pensé a Pacòt a pudìa esse cola 'd Gianotti («il serafico Gianotti»), precisand subit apress ch'as tratava di «una fuggevole affinità». Ampostà la custion dla novità 'd Pacòt, 'd Gianotti e Ferrero parleroma comsëssìa n'àuta vira. ëd Giovanni Tesio - da TORINOsette ëd La Stampa dij 16 ëd mars dël 2012

Indietro