Giuseppe Novajra

A l'é bela l'deja dë smon-e gropà 'nsema lìber e cd 'd canson, coma a l'ha fàit l'editor Giancarlo Zedde 'd Turin publicand «Globale» 'd Giuseppe Novajra (www.zedde.com, €15). Giuseppe Novajra a l'é bin conossù an Piemont, tra ch'i a l'ha la passion dla lenga e dla poesìa piemontèise, përchè a l'é un dij nen tante cantautor ëd ca nòstra che an costi ani a l'ha scrivù 'd canson, fàit ëd cd, colaborà con Companìe teatraj për canson e mùsiche, e a l'ha 'dcò scrit ëd sò comedie mùsicaj, e un-a për marionëtte. E ij nòsti letor a arcoderan 'l sò cd gropà al lìber «Mè borgh San Pàul Milaneuvsent» (Edission Ël Torèt-Monginevro Cultura). N'amor col për ël piemontèis ch'a l'ha coltivà e arnovà mersì a l'amicissia e la frequentassion con poeta e scritor dj'anviron dij Brandé, e con studi e arserche sla canson popolar, da cole ch'a giro anònime fin-a a le canson d'Isler, Broferi, Farassino e Balocco. Ant cost lìber-cd a-i son disdeut canson, test e mùsica e vos ëd Novajra, «arrangiamenti» musicaj 'd Giancarlo Zedde. Ant ël lìber le poesìe-canson a son compagnà a front da la tradussion an Italian. Le canson ëd Beppe Novajra as dësròlo tra tradission e arserca 'd neuve stra, atension al social e sentiment. A s'ancamin-a da «Globale» ch'a dà 'l tìtol a l'euvra, na riflession su la manera 'd vive, 'd travjé, 'd pensé dij di 'ancheuj, d'un "pianeta sensa noanse" (senza sfumature!); e as va anans con: «Le rèis dla montagna», montagne che coma «onde a s'àusso vers ël cel»; «Brigata Cirio» (parèj a ciamavo ant j'ani Sinquanta ij pòver ch'a s'ambaronavo 'dnans a caserme e ospidaj...spetand ij vansorio dij past con an man na tòla dla Cirio), «vardé sì ch'a riva la brigata Cirio,/ panse veuide, tòle pien-e,/vardé sì, a va via la brigata Cirio,/tòle veuide, panse pien-e/...Ma des.../pì gnun a sa 'l martirio/dla gloriosa vita dla brigata Cirio»; e ancora canson ch'a marco passagi pì interior e poetich coma «L’ùltima», «Feuja dòp feuja pian/ tut as dëspeuja col branch/ fin-a ch'a-i resterà mach/ na feuja, l'ùltima lì tacà»; o «Compagnà da la lun-a», «Mi i canterìa compagnà/ da la lun-a canterin-a an cel,/ da la lun-a për ti, bela cita»; e coma «Amor sempre verd», «përchè mi l'hai la fiusa/che l'amor a sia etern come etern a l'é 'l sol»; fin-a «Róndole» ch'a sara 'l lìber e 'l cd, da lese e scoté. d'Albina Malerba - da TORINOsette ëd La Stampa dij 23 ëd mars dël 2012

Indietro