Guide dl'Editor Forni ëd Bològna

Stavòta na còsa 'n pò dròla. Squasi a smijrìa ch'i foma 'd propaganda për cont d'un editor, nopà foma d'informassion për cont ëd j'amator. Vuroma dì ch'a-i é 'd catàlogh ch'a giro e ch'a l'é bel sgaté përchè ch'a smon-o 'd lìber rair e difìcil da trové ma ch'a peulo fé la gòj e 'l bin 'd tanti ch'a serco 'd rairità. I l'hai sì 'dnans a mi un ëd costi catàlogh, «Guide folklore e dialetti» dl'editor Arnaldo Forni 'd Bològna. A va sota l'ansëgna 'd «Conoscere l'Italia» e a fa 'n pò da final al sent e sinquantèsim aniversare dl' Unità. Gnun-e presse naturalment përchè ch' as trata 'd vendite për corispondensa (për avèjlo a basta scrive a Arnaldo Forni Editore, via Stelloni 3/A, 40010 Sala Bolognese, Bologna), ma a l'é ben nufié 'd tìtoj ch'arfëstio nen mach ij colessionista (tutun për caté basta scrive al midem editor). Për la vrità a-i é tanto për tante region italian-e nen tan për ël Piemont, ma col pòch - pì an italian che an piemontèis - a fa piasì contelo. Ancaminand da Maria Savi-Lopez e da la soa guida a «Le Valli di Lanzo», dël 1886 (pp. 494, euro 42), ch'a conta la stòria, ij paesage e la vita magica dla Val ëd Viù, dla Val d'Ala e dla Val Grande. Për rivé a Gaetano Di Giovanni e ai sò doi tìtoj, tuj doi dël 1889. Un, «Alcune usanze del Canavese» (pp. 78, euro 14) e l'àut, «Usi, credenze e pregiudizi nel Canavese» (pp. 191, euro 16). Ma peuj - cambiand materia, ch'a l'é cola dl'internassional dij cit - n'àut lìber ëd Filippo Seves, publicà a Pinareul dël 1890, «Ninne-nanne, filastrocche e sorteggi nella Valle di Pinerolo» (pp. 108, euro 13). Për finì, tre vocabolare ch'a son un pì galup che l'àut. Ël «Nuovo dizionario piemontese-italiano» 'd Giovanni Pasquali, publicà dël 1870 (pp. 653, euro 44); ël «Dizionario del dialetto valsesiano» 'd Federico Tonetti, publicà a Varal dël 1894 (pp. 334, euro 23 (pì 'd ses mila vocàboj), e peuj, giontand al Piemont - fùissa pa mach për rason dë stòria e d'avzinagi - la Val d'Osta, 'l «Dictionnaire du patois valdôtain précédé de la petite grammaire 'd Jean-Baptiste Cerlogne», edission 1907 (pp. 316, euro 24). Sensa dësmentié 'l «Glossario etimologico piemontese » 'd Giuseppe Dal Pozzo (tremila vocaboj) publicà a Turin dël 1888 (pp. 250, euro 26). Na mëssonà gnente mal, ch'i l'oma fàit për fé vnì na frisa 'd gòj e na fërvaja d'anvìa. ëd Giovanni Tesio - da TORINOsette ëd La Stampa dij 30 ëd mars dël 2012

Indietro