Film su Tavo Burat

«Cibarsi di roba buona e fresca di casa nostra, può essere una delle vie...per salvare il mondo». A lo scrivìa ant ël 1999 ël poeta Tavo Burat sota l'ansëgna «dl'arvira dij pom». Su Burat l'Ecomuseo Valle Elvo a l'ha fàit un film, soagnà da G. Pidello e M. Pellegrini. La prima part, «Ritornare selvatici», 52 minute girà ant la prima dël 2009 sle montagne bielèise, la Val dl'Elf e dël Serv, e ant l'an-ca-da-fé 'd Tavo (l'antica casa del fuoco), a l'é soa ùltima lession, l'ultima «demoda» dl'òm salvèj, l'anvit pressant a l'òm d'ancheuj a tense a la tèra, a goerné soe radis, soa bio-diversità, cola arvira dël pom che chiel a l'ha lansà tanti ani fa, prima dla moda, bin ëvnùa, dij km 0. La sconda part, «Le parole nomadi», a l'é un montage 'd 25 minute 'd sequense sl'atività'd Burat dal 1984 al 2009, ch'an ripòrto un Tavo giovo e gajard, ch'a combat për la lenga piemontèisa, për le pome e pomëtte bielèise... për fra Dossin, e ch'a predica an piemontèis ant la cesa Valdèisa.. Un film testimoniansa, la lession d'un poeta re-pastor-bërgé ch'an mostra la stra 'd lòn ch'a conta dabon, sle nòte 'd na veja canson che Burat a 'nton-a sot vos «...la lun-a e 'l sol...ma 'l prim...a l'é nòst Signor». d'Albina Malerba - da TORINOsette ëd La Stampa dij 19 d'otóber dël 2012

Indietro