Premi për un test teatral ant le lenghe dël Piemont

Quindes scartari (e tanti pì tìtoj) për n'inissiativa ch'arsist, e che (miraco) a l'é squasi 'n miraco. Quindes agn ëd vita dël «Premio per un testo teatrale nelle lingue del Piemonte» bandì da la Region Piemont (Assessorato alla Cultura e alla Politiche Giovanili) e vita neuva për lë scartari ch'a fa quindes, come sempe cudì da la Ca dë Studi Piemontèis (pp.208; euro 14; tel. 011/537.486, info@studipiemontesi.it). Stavòta a vince a l'é la comedia d'Oscar Barile, «Maria e Madalena», scrita ant un lengage 'd Langa (Barile a l'é 'd Sini). A feje compagnìa (bela dësfida) la tragedia 'd Diego Anghilante, «Bastian Nevacho», scrita ant un ossitàn che Anghilante a dis d'esse fasse d'aspërchiel an ciapand da sì e da là: da la Varaita ëd mes fin-a a la Gran-a, a la Màira, a la Stura. Na lenga (legìtima ant un'euvra literaria) che n'autor a l'ha tuj ij drit ëd sagomesse. Tutun, ant l'euvra 'd Barile a-i é na bela misura 'd pratica teatral, ch'a ven da l'atività che chiel a fa an Langa (e nen mach) con soa compagnìa. Forse 'n pò pì ambissiosa, ma meno convincenta la tragedia d'Anghilante, combin ch'a-i sia andrinta 'd moment àut e pontù. Bin intèis, ant tute doe na resistensa ch'a pias, na speransa ch'a consola. ëd Giovanni Tesio - da TORINOsette ëd La Stampa dij 7 dë dzèmber dël 2012

Indietro