Poesìe ëd Natal

L'é vèra che l'Epifanìa tute le feste a pòrta via, e che ste feste a son volasne leste pì che an pressa, ma forse a val ancor la pen-a sité un lìber surtì sla broa dël Natal, che a pùblica na sèrnia 'd 67 poesìe ëd Natal, soagnà da Giovanni Tesio, con ël bel tìtol "L'ombra della stella", e sota al tìtol la diciarassion "Il Natale dei poeti d'oggi" (Novara, Interlinea, pp.168, euro 12). E i lo sitoma volenté an costa rubrica përchè ant la lista dij poeta antologisà an ordin alfabetich, da Alziati a Zuccato, a-i son nen mach ëd poeta piemontèis ch'a scrivo an italian, coma Gian Luca Favetto, Beppe Mariano, Paola Mastrocola, Maria Luisa Spaziani, mach për dì chijche nòm, ma 'dcò 'd poeta ch'a scrivo ant le lenghe cite, e a l'ha fane gòj lese ij vers provensaj ëd Sergio Arneodo, "Soufle d'amo"; 'l Natal an lega piemontèisa, variant monregalèisa, 'd Remigio Bertolino; 'l Deinal ëd Claudio Salvagno, "El fià de Dieu" dël milanèis Franco Loi. Tanti Natal "modern", declinà, coma a dis Tesio ant la presentassion, sensa "l'ingenuità della "favola antica"", ma con na soa "intima e segreta nostalgia". Un lìber grassios da lese ant un di 'd fiòca, e goerné an giojera për l'ani ch'a-i ven. d'Albina Malerba - da TORINOsette ëd La Stampa dj'11 ëd gené dël 2013

Indietro