Gian Antonio Bertalmia

Vivoma temp ëd burian-a. Për tut e për ij lìber pì ancora. Ma as resist, as serca 'd resiste. Ij piemontèis a son gent ch'a mòlo nen la cassòla a la prima dificoltà. Ij bogianen a san rangesse, a conòsso le fatighe e a van anans bele se la buria a-i fa andé pì adase. A l'é bel arsèive 'd lìber ch'a seurto për costa "veja resistensa neuva", coma a disìa Tavo Burat. E an fa tant piasì segnalé ch'a l'é pen-a surtìe, për la Ca dë Studi Pinin Pacòt-Piemonte in Bancarella, un volum ëd conte serie e conte grinòire 'd Gian Antonio Bertalmia, "Ël cel an ponta al dil" , con l'"Achit" ëd Michel dij Bonavé (pp. 140, euro 13). Bertalmia a l'é 'd Carmagnòla, a l'ha scrivù an italian e an piemontèis segnalandse an diversi Concors leterari. Adess a në smon cost bochèt ëd vintesinch conte ant un bon piemontèis nostran, "stòrie 'd vita ch'an conto ij piasì, le por, …la gòj dla gent a la bon-a". Paròle ch'a mosso d'arcòrd, emossion, veuja 'd rije; paròle 'd ca ch'an comeuvo, paròle 'd col bon sens d'antan, passà 'd mòda, ma chi sa mai ch'a peula torna servine; paròle ch'an buto 'd bonimor. E 'd n'onsa 'd bon sangh i-j n'oma damaca an temp coma costi, për nen lassesse dëstissé la speransa, e manten-e visca la fiusa, lë sguard sël passà për l'avnì. d'Albina Malerba - da TORINOsette 'd La Stampa dij 5 d'avril dël 2013

Indietro