Carlottina Rocco e Alfredo Nicola

Aprofito dla mòda aniversaria con la fiusa 'd fé conòsse cheicosëtta 'd nòsta literatura, che a nass lontan, ma che specialment dal Setsent a dventa fòrta e bondosa. Doe euvre 'd doi poeta dël nòst Neuvsent: "An sla brova dël senté" 'd Carlottina Rocco e "Primavere" d'Alfredo Nicola a compisso otant'agn. Doi lìber 'd doi poeta satì. Doi poeta da l'aparensa sempia e da l'arsonansa përfonda, s-ciodù tuj doi da la ciuss dij Brandé dla prima ora ch'a l'é stàit giusta Pacòt. Òm ëd passion për la mùsica, la poesìa, la literatura piemontèisa, Nicola a l'ha contribuì për soa part a dësgagé - con Pacòt, Olivero, Galin-a e tanti d'àutri - dal mufì 'd na vision provincial. Soa creatura pì bela a l'é stàita l'arvista trimestral "Musicalbrandé", crosiera dë studi musicaj, stòrich, literari dël Piemont antich e modern (ma soa ambission bin cudìa a l'é stàita cola d'esse poeta). Tuta poesìa dë nuanse cola 'd Carlottina Rocco, ch'a l'é come sò arcansiel: "luminos, sospèis ant l'aria - a disìa Pacòt - a l'é un pont tra tèra e cel". Cite curniss, cit ricam, quadret ëd natura, stagion, segn, vos tra lus e ombra, tra gòj e pen-a, tra vita e memòria. Për tuj doi - Nicola e Carlottina - poesìa come anciarm ëd vita. ëd Giovanni Tesio - da TORINOsette 'd La Stampa dij 12 d'avril dël 2013

Indietro