Ignassi Isler

Për un poeta, avèj n'edission critica 'd soa euvra a l'é esse butà a l'onor dël mond. Se a-i son dë studi e antologìe dj'autor an lenga piemontèisa, tant a resta da fé da la mira d'edission filologicament soagnà, përchè a son nen travajòt da pòch: a-i va competensa, passiensa, conossensa, veuja e amor: ròba che al dì d'ancheuj a scarsegia. A l'é për sòn che a venta saluté con gòj e orgheuj la publicassion dle "Canzoni piemontesi" 'd P. Ignazio Isler (1699- 1778), "edizione critica del testo, introduzione, traduzione italiana, commento ed indici", soagnà da Dario Pasero (edission Associazione Culturale "I Luoghi e la Storia" d'Ivreja, pp.454; për catelo: sloira94@tiscali.it). Isler "è un poeta - a scrivìa Gianrenzo P. Clivio ant soa stòria dla leteratura (2002) - di importanza capitale nel Settecento piemontese e quant'altri mai da rivalutare". E Pasero con cost lìber soasì an fa cadò d'un travaj certosin, ch'a l'avìa ancaminà a pijé l'andi fin-a dal 1992, quand, a dis ant la "Premessa", pròpi cissà da Clivio "avevo iniziato a leggere e a studiare i manoscritti e le edizioni dell'Isler". Da armarché che oltra ai test, le nòte e a tuti ij confront crìtich, për la prima vòlta a son tradòte an italian tute le oltre 50 canson dl'Isler. I na parleroma ancora. d'Albina Malerba - da TORINOsette 'd La Stampa dij 19 d'avril dël 2013

Indietro