Salon dël Lìber 2013

Tuti j'ani l'oma salutà con gòj l'anandiesse al Lingòt dël Salon antërnassional dël lìber, e i lo foma con piasì 'dcò për costa edission ch'a fa 26 - na bela partìa d'ani - un randevó sempe galup për tuti noi che ij lìber an pias vardeje, tocheje, lesie, avèje ant nòste biblioteche 'd ca. E costa giojera sensa finagi ch'a l'é la fera dël lìber a l'é ocasion d'òr për dësnicé d'euvre che ant le librerìe as treuvo pa vàire: cite editor, associassion che na vira a l'ani a l'han soa visibilità ant le contrà lìterarie dël Lingòt. I l'oma nen pro 'd righe për dé la posission djë stand ch'a l'han lìber an piemontèis, ma a basta avèj la passiensa 'd virolé, dë sgaté, 'd vardé e as trovran. Për chi a l'é anteressà a le lenghe cite, tra le manifestassion dël Salon venta nen manché cola 'd saba 18 ëd magg, a 3 bòt dël dòp disné, an Sala Arancio: as presenta 'l Comitato per la Salvaguardia dei Patrimoni Linguistici, përson-e 'd tute le region ch'a l'han ancaminà a travajé ansema da pòchi mèis. "Dove osano le idee" a l'é 'l mòt dël Salon 2013, che noi piemontèis i podoma tradùe an diverse manere: dova a s'ancalo le ideje, dova le ideje as geno nen, dova le ideje a pijo corage….. i anvitoma ij letor a gionté la soa. d'Albina Malerba - da TORINOsette 'd La Stampa dij 17 ëd magg dël 2013

Indietro