Premi a la Tradission Piemontèisa

Castion d'Ast (Castiglione d'Asti), fin-a al 1929 Comun-a e adess frassion d'Ast, dova as fa 'l Grignolìn pì bon e s-cèt, a l'ha goernà soa identità mossanta. Tra le tante inissiative dla Pro Loco, a va segnalà ël "Premio alla tradizione piemontese" , che st'ani as fa për la tersa edission. La festa a l'é për duminica 2 ëd giugn an piassa a parte da 4 e mesa dël dòp disné. An fa piasì che 'l Premi Tradizione Piemontese 2013 a sarà consignà al regista Massimo Scaglione, che tant a l'ha fàit për ël Piemont, për ël teatro, për la lenga piemontèisa. Un premi ch'a podìa nen esse pì bin dàit: Massimo Scaglione a l'é stàit un dij protagonista, con Gipo Farassino, 'd na stagion tant fortunà dël teatro piemontèis. E al teatro Massimo a l'ha 'dcò dedicà diversi studi, l'ùltim, ch'i l'oma 'dcò segnalà an cost canton, un travaj su Carlo Artuffo. Ansema a Scaglione a sarà 'dcò premià, për la session "Tradizione e territorio astigiano", la Companìa Teatral Angelo Brofferio. Ansema a la premiassion a sarà possìbil visité ant la Cesa 'd San Martin la mostra "La rinascita nelle campagne del secondo dopoguerra". E peui, le tradission a son tradission!, canson, spetacoj e marenda sinòira. Soma tuti anvità për feje festa a Massimo Scaglione e dije grassie për sò angage piemontèis. d'Albina Malerba - da TORINOsette 'd La Stampa dij 31 ëd magg dël 2013

Indietro