Simona Colonna

Simona Colonna a l'é na musicista "roerin-a" an piòta. A l'ha studià flauto travers e violoncel a l'Istituto Rocca d'Alba e al Consevatòri 'd Coni. Aranda a l'insegnament ëd mùsica a l'ha 'ncaminà na bela cariera artistica ch'a l'ha portala an gir për ël mond, fin-a a Cina. Ma "la creatività - a scriv - insieme alla parte curiosa dell'anima, spesso, ti porta lontano a cercare novità…ma gira e rigira poi torni a casa". E Simona, possà da cost arciam, a l'é tornà a ca e a l'é angagiasse con na soa manera bin originala ant la mùsica piemontèisa, con canson ant la lenga 'd soa tèra ch'a scriv e a mùsica e a canta, con na fòrsa e n'energìa mossanta. A l'ha vinciù 'l Biella Festival Autori 2011 e a l'ansëgna 'd "Musica made in Biella" l'ha fàit ël sò prim cd, tut an piemontèis, con le canson: Bacialé, Masca vòla via, Ninnaoh, Pòrtme via da sì, Brigante Stella. Ël cd, dal tìtol "Masca vòla via" ("La stòria ch'am piasiva scoté da mia nòna/parlava dra masca ch'a stava ant ra Langa.."), a l'é compagnà da na plachëtta con ij test dle canson an piemontèis, con tradussion an italian e an inglèis. Vardé le anformassion sël sit: www.simonacolonna.it, dova as treuvo le neuve dij consert e fin-a scotesse quàiche s-cianchèt ëd soe canson. d'Albina Malerba - da TORINOsette 'd La Stampa dij 13 dë stèmber dël 2013

Indietro