Costa & Pacòt
Ai é ant la literatura dël nòst Neuvsent doi autor ch'as dëstaco da j'àutri për diverse rason. An capita sì cheicòs ch'a j'ësmija a la literatura italian-a. Lì noi dioma : Dante e Petrarca. Bin, ambelessì (an latinorum, si parva licet): Costa e Pacòt. Còsa veuj dì?
Pa che Costa a sia Dante e Pacòt a sia Petrarca, ma ch'a sia 'n pò coma s'a fuissa parèj. Gnun misteri. A veul mach dì che Costa a l'ha na lenga ch'a ciapa 'n pò daspërtut e a l'ha na larghëssa 'd riferiment stòrich ch'a deurv a ventajin-a, damentré che Pacòt a dòvra paròle satìe con msura pì streita, pì gropà coma pòrta soa lenga neuva e squisìa. Ma peuj - dit sòn - se un a va lese pì 'ndrinta, a stanta pa a trové cheicòs ch'a gropa ij nòsti doi autor ant un-a vision comun-a.
Da part ëd Costa a l'é 'n pò coma s'a s'avsinèissa a na sèrnia lessical pì rafinà e lingera. Da part ëd Pacòt coma s'a sentijssa në bzògn d'esse pì drù e pì fòrt. Tut ansema doi poeta ch'a l'han trovà na stra për disse na stima nen da pòch. Costa ch'a scheuvr la poesìa 'd Pacòt e che - bin sensìbil - subit a la dis neuva. Pacòt ch'a manca nen - magara apress d'avèj 'n pò cicognà - 'd dì che Costa a l'é 'n "magister" da sempe scotà e onorà. Doe bele stra, doe bele crosiere.

ëd Giovanni Tesio - da TORINOsette 'd La Stampa dij 13 dë dzèmber dël 2013


Indietro