Spasgiade poétiche

An costi temp maleuros, dova as sent daspërtut bacajé con malagrassia, a fa gòj vëdde ch’a-i é tanta gent ch’a ten ancor da cont la poesìa, ‘l silensi, ij canton ëd pas e ‘d blëssa che nòsta tèra an regala. A l’é lòn ch’i l’hai provà quand dësfojand ël lìber «Passeggiate poetiche. Prose e poesie piemontesi», soagnà da Ezio Girardi, e publicà da l’Associazione Amici della Cultura Piemontese” (mailto:amiciculturapiemonte@tiscali.it). A l’é n’antologia ‘d poesìe e ‘d pròse an piemontèis ëd ses autor: Maria Luisa Chiorino, Marisòt (1912-1989), Aldo Gavosto (1922-2002), Carlottina Rocco (1909-1992), poetëssa squisìa ch’a l’é stàita tra ij fondator dij «Brandé» con Pinin Pacòt; e peui tre autor dij nòsti di: Rita Giacomino ‘d Castelneuv Nigra, che a Nigra a l’ha dedicà diversi studi; Giorgio Maria Robatto, ‘d Cheuri; Bruna Marten Canavesio ‘d Vico Canavèis. Ij test, con la tradussion an italian, a smon-o n’itinerari ant nòste valade e ant ij nòsti pais, coma a sugerisso le fòto ch’a compagno ij vers. Un bochèt ëd paròle për anandiesse ant ij senté “reali e fantastici” dël Piemont: da le montagne ai pra ‘d margritin, a le gesiòte dla Val Sacra, dal Po a San Colomban, da Castelneuv Nigra a Cheuri a Baron a la Valciusela… d'Albina Malerba - da TORINOsette ëd La Stampa dij 14 ëd fërvé dël 2014

Indietro