Amerigo Vigliermo

Atene del Canavese a l’é na cita e an piòta Ca editriss ch’a l’ha sede a San Giòrs Canavèis (http://www.atenedelcanavese.it), e a l’ha da pòch publicà un travaj fiamengh su Amerigo Vigliermo e ‘l Còro Bajolese, un-a dle realtà pì amportante e conossùe ch’i l’oma an Piemont: «Voci del Cuore. Tutto continua Insieme». As trata d’un lìber soagnà da Ilario Blanchietti e Andry Verga, con la prefassion ëd Gian Luca Favetto, ch’a sfeuja la storia dël Còro e del Centro Etnologico Canavesano, contà an prima person-a dal prim ator e anima e regista Amerigo Vigliermo; con ij test dle canson comentà e spiegà, e con anformassion e fòto dij corista. ? ansema al lìber a-j son un Dvd con ij video dij 19 cant dël Còro Bajolese, regia d’Andry Verga, e un Cd con le 19 canson registrà ant ël Teatro ‘d pòsa Masterblack. A l’han contribuì a costa inissiativa l’Associassion «Foravia» e l’Archivio Audiovisivo Canavesano. Lìber Dvd e Cd ansema a rendo omagi a l’angage ‘d tuta na vita d’Amerigo Vigliermo e dël Coro, e a rapresento «un percorso attraverso straordinarie esperienze di vita, lavoro, amore, sofferenza, sacrificio di cui i canavesani sono sempre stati orgogliosamente artefici». Un travaj ch’a sarìa bel a fèissa scòla. d'Albina Malerba - da TORINOsette ëd La Stampa dij 25 d'avril dël 2014

Indietro