Salon antërnassional dël Lìber ëd Turin

Ant ël vir a vir dij mèis i soma torna rivà ai di gajard dël dël Salon antërnassional dël Lìber ëd Turin al Lingòt për l’edission ch’a fa 27, fin-a al 12 ëd magg: ël randevó pì galup për chi ai lìber a-j veul bin. E ‘l Bin (o Ben, coma a-j piasrìa ‘d pì a l’Azèj o ai piemontèis ch’a parlo soagnà) a l’é l’ ansëgna dël Salon 2014. Bin o ben (dì ‘l Bin an piemontèis a veul ëdcò dì «preghé», dì j’orassion) an fa gòj segnalé, ant l’inmensa giojera dël Lingòt, chijche editor ch’a pùblico ‘dcò ‘d lìber an lenga piemontèisa, bin savènd ch’i na dësmentioma tanti: da Viglongo (pad. 1, stand F46), al Comitato Editori Piemonte (pad.1, stand F 51- D52), da la Ca dë Studi Piemontèis-Centro Studi Piemontesi (pad. 2 stand K 02), a l’Artistica Savian (pad.2, stand L 01), a Neos (pad. 1 stand F 22), a Graphot (pad. 2, stand M 34), da Daniela Piazza (pad. 2, stand N 83), a Hever (pad 2, stand N 63 ), a Il Punto Piemonte in Bancarella (pad. 3, stand S 10 ), e ai tanti editor ch’a l’é franch un piasì, na gòj, andesse a dësnicé, viroland an mes a cost mond ëd paròle, pagine, righe, papé, masnà, gent… për trové bon ben bin ch’an fasa bin për ch’i peusso vorèj bin a nòsta tèra, fé bin e fé ‘d bin për esse gent da bin. d'Albina Malerba - da TORINOsette ëd La Stampa dij 9 ëd magg dël 2014

Indietro