Papa Bergoglio e Nino Costa

«Poeta, cantoma la vita: la bela vita nostran-a,/un po’ stòrta, un po’ drita,/ ma tëggia, ma san-a,/…/pronta a qualonque difeisa,/come l’anima piemontèisa/ ch’a l’é ‘ncor nen mòrta…». A son ij vers d’inissi dla poesìa «Le siale» ‘d Nino Costa, un-a dle «Cento poesie», che ‘l Corriere della sera e La Civiltà Cattolica a l’han publicà come volum n. 11 dla colan-a «La biblioteca di Papa Francesco» (soagnà da Antonio Spadaro, për Corriere della Sera, 2014, pp. XXXI-431), distribuì ansema al Corriere dal 17 ëd luj: darmage che a Turin a sìa rivà an bele gnun-e edicole...ventava savèilo e feslo rivé a pòsta! An tuti ij cas a l’é stàita franch na bela inissiativa che un dij nòsti pì avosà poeta an lenga piemontèisa a l’abia trovà atension ant una colan-a nassional: miraco un miracol ëd Papa Francesco! L’edission a propon l’antologìa dle «Cento poesie piemontesi» ‘d Nino Costa, publicà da l’editor Viglongo dël 1995 e peui dël 2013, e a l’ha n’introdussion ëd Giovanna Viglongo, e la prefassion «Un poeta della tradizione piemontese riletto alla luce del Papa venuto ‘dalla fine del mondo» ‘d Giovanni Tesio e mia. Coma a scriv la Viglongo, tuti noi duvrìo sente la gòj che cost lìber a sìa dventà «un prezioso grano nella collana della Biblioteca del Papa». d'Albina Malerba - da TORINOsette ëd La Stampa dij 5 dë stèmber dël 2014

Indietro