Ël Cant dij Presepi

La vita l’é viva/l’é naje ‘l Bambin/ la roa a dësvira/ sò viramulin». A son ij vers d’un-a dle bele poesìe ‘d Natal e sël Natal, an piemontèis e an italian, ëd Giovanni Tesio, publicà ant una plachëtta soasìa pen-a surtìa da l’editor Interlinea: «Il canto dei Presepi. Poesie di Natale» (2014, pp. 68, 10 euro), compagnà da ‘d bele bigieuje d’artista d’ancheuj (da Giovanni Tamburelli, a Ugo Giletta, da Alberto Casiraghy a Mario Mondino, e peui Stoisa, Nisbet, Garis, e d’àutri). Na «suite» ‘d sëdes poesìe d’un Natal ancantà, «Natal d’una vòlta/Natal con al fiòca/ Natal dël Bambin/Natal campagin»; Natal con le stèile, ‘l Presepio (che chijdun a vorerìa fene scancelé), j’angèj, fusëtte, cunòt, pastor, glòria, candèile, Giusep e Maria, ij re mage, ‘l beu e l’asnòt…tut ël mond e l’anciarm dij nòsti Natal masnà. «Na neuit tra le tante?/ Ma gnanca për seugn:/ grumele lusente/a pico da leugn/…/Fusëtte ch’a rampio/ për mila scalin/ parpèile rijante/ ch’anvisco ‘d sofrin/…/L’é la religion/ dle còse ch’as gropo/ an tuj ij canton/presense ch’as toco…». Poesìe «che evocano sentimenti religiosamente antichi e infantili», ch’a riesso a fene aussé për un moment j’euj vers l’aut e l’autr: «Tutti sono presi dalla vita/ e il bambino ne indica la meta.//Il senso del presepio è tutto qua:/ la vita, e un grumo di felicità». Parleroma dël «Canto dei Presepi» ‘l 20 dë dzèmber a ses ore, al Circolo dei Lettori, për la Vijà 2014 dla Ca dë Studi Piemontèis. d'Albina Malerba - da TORINOsette ëd La Stampa dij 12 dë dzèmber dël 2014

Indietro