Bèica ‘n pò (Amemanera)

Realisà tra magg e novèmber 2014, a l'é pen-a surtì un CD d'Amemanera (la cobia motobin an piòta e angagià dla neuva tradission dla mùsica piemontèisa, Marica Canavese e Marco Soria): a s'antitola "Bèica 'n pò" e a cheuj 12 tòch, canson dla tradisison e canson neuve scrite e musicà da Amemanera (info@amemanera.com). Tra le neuve "Òj s'a veuj", "La Furmija", "Ël cheur che l'hai pa pì", e la canson dël tìtol, tute test e mùsica 'd Marco Soria e Marica Canavese vos; tra le tradissionaj "Teresin Tersinòta", "Pelegrin ch'al vèn da Roma", "Le tre sorelin-e", registrà dal viv a la "Matra" 'd Tagliòlo Monfrà; e d'àutre dla tradission popolar, tute rangià da Marco Soria; la vos sempe cola 'd Marica, e ansema a lor, àutri musicista avosà coma Guido Guglielminetti, Andrea Bertino, Elio Rivagli, Alberto Parone, Carlo Gaudiello, Massimo Scoca, Luciano Alì, Claudio Rossi, Beppe Lombardi, Greg Cohen. Registrà e mës-cià da Gabriele Massa. La plachëtta ch'a compagna 'l disco, a l'ha tuti ij test an piemontèis, con tradussion an italian e an inglèis, ch'a l'é la pì bela manera 'd fé volé nòste canson dëdlà dij finagi regionaj. Un travaj ch'a conferma la stra drita e ciàira, originala, moderna e d'antan ansema, che Amemanera a l'ha anviarà e a pòrta anans con passion e convinsion, a la mòda dij piemontèis, a soa manera. d'Albina Malerba - da TORINOsette dLa Stampa dij 23 ëd gené dël 2015

Indietro