Poesìa sla broa

Ant un temp che parlé ‘d poesìa at fa smijé dròlo come un ciochin ëd bòsch, arsèive, pròpi al but dl’an, un lìber pitòst bondos ëd pagine ch’a parla ‘d poesìa, e dla poesìa «ai margini», sla broa i podrìo dì a la piemontèisa, a fa gòj. Peui vardé la tàula e trové ‘dcò tanti nòsti poeta…alora a l’é na ròba ch’a buta ‘l cheur an festa. L’autor ëd costa racòlta dë studi a l’é Giovanni Tesio, l’editor Interlinea: «La poesia ai margini. Novecento tra lingua e dialetti» (pp. 320, 20 euro). Dij tòch che Tesio a dedica ai «nòsti», chijdun a l’é già stàit publicà da l’arvista «Studi Piemontesi» o da edission dla Ca dë Studi, e d’àutri a son inedit. I segnaloma ij capitoj dedicà ai poeta an piemontèis: Pinin Pacòt (mòrt giusta sinquant’ani fa), Gipo, Giorgio Calcagno, Antonio Bodrero, Claudio Salvagno, Remigio Bertolino, Tavo Burat, Bianca Dorato. Për minca un as treuvo ‘d considerassion ch’a arvelo l’intensità e la fòrsa ‘d na poesìa «ch’a dura» e a fa scòla. Am pias saré con na bela sitassion da Pacòt ch’a peul sislé cost travaj: «La stòria ‘d l’òm a l’é na stra anluminà da na fila sensa fin ëd nòm, ch’as gionto un a l’autr coma ‘d falò ch’a rompo la neuit con sò splendor. E a son nòm ëd poeta, e ‘d pensador, che al pensé a l’han daje forma ‘d poesìa, e a son ëd creator ëd blëssa». d'Albina Malerba - da TORINOsette dLa Stampa dij 6 ëd fërvé dël 2015

Indietro