Studi Piemontesi

«Studi Piemontesi» a l’é l’arvista publicà da pì che quarant’ani da la Ca dë Studi Piemontèis; a seurt doe vòte ant l’an e a studia la coltura dël Piemont a 360 gradi: da l’art, a la leteratura, la stòria, la lenga, ant na paròla dla siviltà piemontèisa. A l’é «goernà» da un Comità dë studios dle diverse materie, con Diretor Rosanna Roccia. Dal volum dl’invern, XLIII, 2 (2014), tut da lese për ij tanti artìcoj anteressant, i segnaloma lë studi ‘d Luca Bellone, motobin galup për la lenga piemontèisa: «Lo sciocco in piemontese: preliminari di un’indagine onomasiologica». L’indagine portà anans da Bellone, messonand an tuti ij pì amportant vocabolari e repertori piemontèis, a l’ha arlevà e studià da la mira scientifica e etimologica, pì ‘d 200 manere për dì «chi è poco intelligente, privo di vivacità di spirito e di arguzia, superficiale, stupido, babbeo». Dai pì dovrà, «badòla, fabiòch, falabrach, stival, tòni, tulipan», a le forme pì dròle «antregh, biciolan, ciolandran, torlo, torolo» e via parèj. Lë studi a aprofondiss, ant la part fìnal, doe paròle, tra le pì conossùe: «Balengo» e «Badòla». Pròpi un travaj con ij fiòch e le frange. Chi a veurèissa consulté l’articol, o caté ‘l nùmer dl’arvista, a peul ciamé la Ca dë Studi Piemontèis (contrà Ottavio Revel 15, Turin, tel. 011/537486; info@studipiemontesi.it, www.studipiemontesi.it). d'Albina Malerba - da TORINOsette dLa Stampa dij 20 ëd fërvé dël 2015

Indietro