Antologìa dialetal

Publicà a Camerano (An) da Gwynplaine, a l’é surtìe na gròssa antologìa, soagnà da Manuel Cohen, Valerio Cuccaroni, Giuseppe Nava, Rossella Renzi e Christian Sinicco, con ël tìtol «L’Italia a pezzi», nen ant ël sens d’un pais «a tòch», a rabel, ma coma a spiega ‘l sot-tìtol n’ «Antologia dei poeti italiani in dialetto e in altre lingue minoritarie tra Novecento e Duemila» (isbn 98-88-95574-41-7, pp. 745, 20 euro). A son antologisà ‘n pòch pì ‘d sent poeta, region për region, con l’ambission ëd fé «una mappatura della produzione poetica neodialettale e posdialettale dell’ultima fase del Novecento e dei primi anni del Duemila». Për ël Piemont i trovoma: ant la prima part, cola dj’autor ch’a son nà tra j’ani Tranta e Quaranta dël Neuvsent, Remigio Bertolino e Bianca Dorato, doi poeta an lenga piemontèisa ch’a son ormai ‘d classich; ant la sconda part, tra j’autor nà dal 1950 an peui, ij piemontèis pijà an considerassion a son quat: Dario Pasero, bin avosà ‘dcò coma studios ëd leteratura piemontèisa; Annamaria Balossini ‘d Noara; Michele Bonavero, ‘l nòst Michel dij Bonavé angagià ‘dcò coma scritor ëd teatro e ‘d pròsa; e Nicola Duberti dël Mondvì (l’antologìa a ten nen cont dël sò lìber surtì dël 2013 për le edission dla Ca dë Studi Piemontèis). E peui an fa piasì sité la presensa ‘d Lia Cucconi, ch’a viv a Turin, ma ch’a scriv ant soa parlada ‘d Carpi (Emilia): duvoma a chila l’omagi ‘d costa antologìa. d'Albina Malerba - da TORINOsette dLa Stampa dij 6 ëd mars dël 2015

Indietro