Rinaldo Doro

Rinaldo Doro, a l’é un bin conosù monsù ‘d Civass, che da quand a l’ha ancontrà Amerigo Vigliermo e ‘l Còro Bajolese, a studia e a pùblica ‘d travaj ‘d mùsica popolar; a l’é ‘dcò n’apassionà dë strument tradissionaj, ch’a l’é bin an piòta a manegé, e spartì antich. A l’é angagià an costa arserca, nen për nostalgìa, ma për cheuje le testimonianse da la vos dla Gent, convint che «la conoscenza e la consapevolezza» a devo vnì a taj për passé a le generassion neuve na siviltà, con ij sò valor, soa dignità, soa fòrsa. Un capitol amportant për la stòria dla Coltura Popolar dël Canavèis (e nen mach, i giontoma noi), a l’é adess ant un lìber che Rinaldo Doro a pùblica da l’editor ëd San Giòrs, Atene del Canavese: «Sonador da Coscrit e da Quintët. Ricerca sulla musica popolare in Canavese e Valle d’Aosta seguendo il sentiero tracciato da Amerigo Vigliermo», con un cd ch’a cheuj vàire ‘d coste mùsiche, coma «La Corenta ‘d Rueglio», «La Pòlca dël Fernèt», «Ël Vals ëd Dòro», sonà, tra j’àutri dal Quintët ëd Breuss, J’oton ëd la Val Ciusela, Ij trombi ëd Rovej…Ël lìber a l’ha, ansema a le testimonianse, e a jë studi, n’elenco dij Sonador da Coscrit dël Canavèis e dla Val d’Osta, jë stranòm ant ij pais, na tàula con ij nòm an gergo djë stument musicaj (na ciadeuvra ‘d creatività linguistica ‘d nòsta gent), pì ‘d 100 spartì e tant d’àutr (pagg. 331; lìber e Cd euro 25). d'Albina Malerba - da TORINOsette dLa Stampa dij 20 ëd mars dël 2015

Indietro