Piemontèis a scòla

As parla sempe dë scòla për sotligné le ròbe ch’a van nen. Nopà, pì ‘d na vòta, an particolar ant le scòle elementar, i l’hai vist ëd realtà fiamenghe, ‘d magistre antiviste e ‘d masnà an piòta, ch’a bagno ‘l nas a tanti savant ch’a pontifico dai sò scagn bin vonzù. E i l’hai torna avune conferma, mersì a la segnalassion d’un pa ‘d na citin-a dla scòla San Michele ‘d Turin masentà da le Seure Missionarie dla Consolà. La stòria a l’é costa: la maestra Giusy Terranova a mosta a la San Michele, e combin ch’a sia nassùa an Almagna a l’ha sempe mantnù l’amor për soa lenga mare, ‘l sicilian, e quand da Turin a torna an Sicilia a lo parla sensa gene. Stupìa che a Turin ij piemontèis a parlèisso pì nen soa lenga piemontèisa, a l’ha ‘ncaminà a cissé j’anlev a fé na recita natalissia con paròle piemontèise. E, mersì a na soa sensibilità lenghistica, st’ani, con l’agiut d’un pare, a l’ha fait fé ai cit dla 5ª n’arserca sël piemontèis: ògni cit ant le feste ‘d Natal a l’ha sercà 50 paròle piemontèise da porté a scòla, peui tuti ansema a l’han scrivù, bin organisà për argoment (la ca, ‘l mangé, ‘l còrp uman, ij vestì, le bestie, ecc..) ‘l «Nòst pcit dissionari». N’esperiment, a dis la magistra Terranova, ch’a l’ha portà an classe tanta gòj, anteresse, curiosità, e për sòn a conta ‘d continué. E noi i-j foma ij compliment e un batiman ëd cheur për la lession ch’an fa a tuti noi piemontèis. Legi o nen legi, regolament, arforme… a son le përson-e ch’a fan la diferensa. d'Albina Malerba - da TORINOsette dLa Stampa dij 3 d'avril dël 2015

Indietro