Salon dël Lìber 2015

Bin ven-a magg! che a Turin an pòrta, da 28 ani a sta part, un-a dle manifestassion pì galupe ‘d tut l’ani për chi a l’ha la passion, o ‘l visse, dla carta stampà e a s’amusa a lese: ël Salon Antërnassional dël Lìber. A l’é anandiasse al Lingòt con la festosa coalera dë stand e montagne ‘d pagine, na giojera ‘d gòj e ‘d piasì për j’euj, la ment, ël cheur. Coma sempe noi anvitoma ij nòsti letor e visité jë stand dj’editor ch’a l’han ‘l corage e as pijo l’arzigh ëd publiché an piemontèis. Ancaminand da Viglongo: Pad.1-Stand F46 (che st’ani a pòrta la neuva edission dle poesìe religiose ‘d Costa); e viroland: Editori del Piemonte ch’a na radun-a vàire ansema: Pad.1-Stand C55 B56; Graphot: Pad. 1-Stand F37; Neos: Pad. 1-Stand F26; Alzani: Pad. 1-Stand F25. Passand a lë scond padijon, al Pad. 2-Stand K01 trovoma ‘l Centro Studi Piemontesi-Ca dë Studi Piemontèis, con tanti lìber an piemontèis ëd soe colan-e, e un cadò, ‘n marca-pagine pòrta-boneur; e peui Daniela Piazza: Pad.2-Stand L 105-L101; e la Hever Pad. 2-Stand J25. Al padijon tre a l’é spostasse L’Artistica Savigliano: Pad.3-Stand S18; e coma j’àutri ani: Interlinea: Pad. 3-Stand P84; Il Punto-Piemonte in Bancarella: Pad. 3-Stand S 10. Costi-sì a son j’editor ch’i l’oma dësnicià noi…ma a-i na saran, i s’auguroma, d’àutri, e ‘l bel dël Salon a l’é pròpe col d’andé al tirie-ti-che-tij-tache, a serché ij lìber pì bej e segret. d'Albina Malerba - da TORINOsette dLa Stampa dij 15 ëd magg dël 2015

Indietro