Sit dël Consej Regional dël Piemont an piemontèis

Na bon-a neuva. Sensa gnun dubi na bon-a neuva. As pudrìa magara pensé ch’a l’é nen bastansa, ma a mi a më smija francament ch’a sia pì che cheicòs. E ven-o a la notissia, che ij giornaj a l’han dàit o a l’han arpià. Lun-es 4 ëd magg, ël Consèj Regional dël Piemont a l’ha lansà an tla neuva version dël sò Sit Internet (www.cr.piemonte.it). Un Sit ch’a l’é da sempe disponìbil an diverse lenghe, ma che da sta vòta a l’ha ‘dcò la version ‘n piemontèis (version ch’a l’é stàita cudija da la Ca dë Studi Piemontèis con la supervision ‘d col che, après la mòrt ëd Gioanin Morel, as peul consideresse l’ultim dij Brandé: veuj dì ‘d Censin Pich). La version an piemontèis – l’é bel dilo – a l’é stàita decidùa ‘dcò mersì a l’arcesta ch’a l’han fane ij tanti piemontèis spatarà ‘n gir për ël mond. A sta mira a pudran bin oghe tuj che la notissia a l’é peuj nen tan cita, përchè a deurv në spassi ch’a va bin dëdlà dël local e dël localism. A mi a më smija ‘n bel gest ëd coltura, ch’a sa gropé l’idiomàtich con l’universal. An costa manera ‘l piemontèis (nen sempe tratà da le Istitussion coma a sarìa meritasse, e con sòn veuj tutun salvé la Region che d’inissiative a l’ha via via cudine grassie a d’assessor e a ‘d dirigent inteligent e ‘d vòte iluminà) a seurt fòra dël sò nì e a pija un vòl che veuj imaginé bin distèis e bin sfrandà. ëd Giovanni Tesio - da TORINOsette dLa Stampa dij 22 ëd magg dël 2015

Indietro