Fritz, l'elefant

Fin-a a stèmber as peul visitesse a la Palassin-a ‘d Cassa dë Stupinis l’esposission «Fritz. Un elefante a Corte», soagà da la Fondassion Ordine Mauriziano e dal Museo Regionale di Scienze Naturali. Ëd Fritz, l’elefant che ‘l vicerè d’Egit a l’ha regalà al re Carlo Felice dël 1827 e che an pòch temp a l’era dventà ‘l sìmbol dël seraj real dë Stupinis përchè as na andasìa a spass quacc e meusi për ij bòsch reaj, i trovoma ‘dcò n’arcòrd ant la stòria dla leteratura an piemontèis. Giusep Arnaud (1797-1869), favolista e scritor ëd Moncalé, «magister d’lingua italiana»(a l’ha scrivune Marco Marchetti an «Studi Piemontesi», 1, 2014), a sita l’elefant e j’àutre bestie dël saraj ant la fàula imità da Esòp, «Ël consej dl’Ors»: «A spasgiavo doi amis/ për ij bòsch dë Stpinis,/ dov a-i va d’intant intant/ a spasgé ‘dcò l’elefant:/ lì a l’é pien ëd serv e ‘d dan [dàin]/ i é la rassa dij fasan,/ i é ‘l cënil [canil], e a-i é le sère/ pien-e ‘d bestie forestere…» e a j’era ‘dcò l’ors dël tìtol. E la fàula a va anans fin-a a la moral: chi a veul lesla tuta a peul trovela, con nòte e coment, ant ël lìber: G. Arnàud, «Fàule piemontèise», Turin, Gioventura piemontèisa, 2005. Nopà për arvëdde Fritz e j’àutre bestie dla fàula…basta andé a Stupinis. d'Albina Malerba - da TORINOsette dLa Stampa dij 12 ëd giugn dël 2015

Indietro