Concors ëd poesìa 'd Ròd

Parlé d’un concors ëd poesìa a smijrìa – con ij temp ch’a coro – na manera për toiré l’eva col ghërsin (tuj a penso che «poesìa» a sia cheicòs ch’a vòla àut e ch’as fa nen ciapé, combin che ‘n poeta come Betocchi a j’ëscrivijssa a Caproni che la poesìa a sta nen con Mazzini, ma con Cavour: tut dit). Se peuj as parla ‘d concors ëd poesìa ‘n piemontèis, pess ‘ncora, përchè lì a la difidensa për la poesìa as gionta la difidensa për le parlade ch’a diso –a lo diso ij cacàm, a l’avrìa dit Tavo Burat – ch’as parlo pì nen. Ma mi, pròpe për sòn veuj parle-ne e arcordé ‘n concors ëd poesìa ch’as ten tuj j’agn a Ròd (visin a Alba) e ch’a l’é rivà a fé vint agn, grassie a l’angage ‘d n’associassion bin ciadlà da Margherita Vaira. Na session dël concors a l’é dedicà a le poesìe ‘n lenga piemontèisa e ‘n tle lenghe minoritarie dël Piemont. An tanti a l’han partessipà, ma ‘l prim premi a l’é ‘ndait a Anna Perucca dla Mòta (dij Cont, provincia ‘d Versèj), con na poesìa ‘ntitolà «Spicé la neuit» (Speté la neuit), an tute soe valense, ch’a van dëdlà dla litra sempia e natural. Ansema chila a l’ha fàit «soa figura» Daniele Ponsero (‘d Turin) ch’a parla ‘d pass përdu e ‘d silense s-ciass. Ma peuj tanti d’àuti da tute part dël Piemont. ëd Giovanni Tesio - da TORINOsette dLa Stampa dij 18 dë stèmber dël 2015

Indietro