Pier Giorgio Gili (1935-2014)

A l’é già passaje n’an da la dipartìa dël regista Pier Giorgio Gili (None 1935-Turin 2014). Për arcordelo, ‘l «Teatro Zeta» a ciama j’amis a artrovesse al Teatro Monterosa (Via Brandizzo 65) saba 10 d’otober a 9 ore ‘d sèira, për rendje n’omagi an cola sala che a l’ha vistlo për tante stagion protagonista, con soa paròla fiera, ‘d regista, scritor, polemista ‘d grand cheur. Gili a Turin a l’ha dedicà sò angage për ël teatro: a l’ha fondà ‘l Centro Culturale Sala degli Intradossi e la Companìa Teatral Teatro Zeta, masentà an prima përson-a; a l’ha organisà rassegne ‘d teatro e ‘d teatro piemontèis; a l’é stàit Diretor artistich dël Teatro Macario, a l’ha scrivù për ël teatro. A l’ha fàit part dla Diression dl’Istituto del Dramma Popolare di San Miniato (PI), e an italian a l’ha soagnà al Teatro Carignan l’euvra «Tra le ali dell’angelo» ‘d Chicca Morone con Valentina Cortese. Mach për dì chijcòs ëd na biografìa tuta passà a l’ansëgna dl’amor për ël teatro. Ma am pias arcordé doe cite perlin-e, le doe plachëtte ‘d poesìe an piemontèis, che a n’arvelo la profonda ispirassion uman-a e spiritual ëd Gili: «Slùid e taròch», surtì për ij tipi ‘d Gioventura Piemontèisa, con la Prefassion ëd Chicca Morone e ij disegn ëd Michela Pachner; e «Caminada», achit ëd Robert Jean-Michel Nové (edission Gioventura piemontèisa-La Bela Gigogin), poesìe an piemontèis, con tradussion an italian aranda, ch’a l’han compagnà sò pass d’adieu. Për soe bataje për nòst teatro, nòsta poesìa, nòsta coltura e ‘dcò për costi pòchi vers ricorderomo Pier Giorgio Gili. d'Albina Malerba - da TORINOsette dLa Stampa dij 9 d'otóber dël 2015

Indietro