Arrigo Frusta (1875-1965)

A l’ansëgna d’un bel tìtol «Tempi Beati. Arrigo Frusta (1875-1965). Dagli anni della bohème di fine Ottocento e dalla stagione d’oro della Hollywood sul Po ai ‘Brandé’», as peul visitesse fin-a al 20 ‘d novèmber a la Biblioteca dla Region Piemont, via Confienza 14, a Turin, la mostra, realisà dal Museo Nazionale del Cinema e dal Centro Studi Piemontesi-Ca dë Studi Piemontèis. N’esposission galupa (alestiment soasì ‘d Maria Riccobene dël Museo Nazionale del Cinema) për conòsse na figura dle pì antrigante dla Turin dl’epoca bela, Arrigo Frusta (nòm da scritor ëd l’avocat Augusto Sebastiano Ferraris), giornalista, alpinista, polemista, poeta an lenga piemontèisa, da le prime preuve dël «Birichin» ai «Brandé» ‘d Pinin Pacòt, animator dël Cìrcol dj’Artista, protagonista tròp pòch conossù dla nassita dël Cine a Turin, tra ij fondator ëd col ch’a dventerà, mersì a la resistensa ‘d Maria Adriana Prola, ‘l Museo dël Cinema, che ancheuj a ciama an sità na bela partìa ‘d visitator. L’esposission a l’é compagnà dal catalògo publicà dal Consèj regional dël Piemont. Për visité la mostra as paga gnente; anformesse për j’orari al n. 011/5757371; opura vardé ‘l sit dël Consèj www.cr.piemonte.it, da ‘ndoa un a peul fin-a tiresse giù tut ël catalògo, soagnà da Silvio Alovisio, Claudia Gianetto e da chi a scriv. d'Albina Malerba - da TORINOsette dLa Stampa dij 23 d'otóber dël 2015

Indietro