Un lìber për Natal
A dila cèira am pias nen la facenda che a stèmber o giù da lì già a s’ancamin-a a parlé ‘d Natal. A më smija ch’a-j gava ‘n pòch ëd cola poesìa masnà che ‘ncor chèjdun a pòrta ‘nt ël cheur. Ma a fòrsa ‘d publicità, lus, e anvit a caté regaj e panaton e cicolatin, adess miraco i-j soma bele davsin. Anlora ‘dcò noi anticipoma che, come da longa tradission, la Ca dë Studi Piemontèis a anvita a la mostra ‘d lìber «Un libro per Natale» (fé cadò d’un lìber a më smija ‘ncor un-a dle ròbe pì bele – a bon pat – e ch’an compagnerà për tut l’an).
Na gran giojera ‘d lìber sël Piemont e an piemontèis, stòria, poesìa, art, cusin-a… mal fé da trové ant le librerie. Tra le novità i segnaloma ‘l bisó dël «Repertorio Etimologico Piemontese-REP”; jë “Stantesèt sonèt» ‘d Giovanni Tesio (prefassion ëd Lorenzo Mondo); opura «La memòria dël temp 2016» (‘l calendari ormai stòrich dl’editriss Il Punto Piemonte in Bancarella); le poesìe ‘d Nino Costa e vàire d’ àutri tìtoj dl’editor Viglongo; quaiche edission fiamenga dl’Artistica Savigliano, lìber ij pì curios e ràir d’àutri cit editor, për tuti ij gust e…tute le sacòcie (dal 12 al 22 dë dzèmber; info: tel. 011/537486; mailto:info@studipiemontesi.it; http://www.studipiemontesi.it).

d'Albina Malerba - da TORINOsette dLa Stampa dij 4 dë dzèmber dël 2015


Indietro