Vijà 'd Natal 2015

A l’ansëgna dij vers dla poesìa «Natal» ‘d Renzo Gandolfo («…E Natal l’é Natal/festa ciàira, lusenta,/ sensa temp, sensa màcie lontan-e:/ d’un ancheuj, che a smija ‘n sempre,/ la caden-a as fa scala/ për che i cheujo ‘l boneur…»), la Ca dë Studi Piemontèis a anvita tuti a la Vijà Piemontèisa 2015, ch’as ten ant la Cesa ‘d San Lorens (ant ël cheur dla sità ‘d Turin, an Piassa Castel), duminica 20 dë dzèmber a 4 ore dël dòp disné. A son-o e a canto Enzo Vacca (arpa celtica) e Simona Colonna (Violoncello); poesìe ‘d Gianrenzo P. Clivio, Bianca Dorato, Giovanni Tesio, Nino Costa, Pinin Pacòt, e d’autri poeta ch’a l’han lassane soe paròle për ël Natal, smonùe da Mario Brusa. La Vijà 2015 a l’é dedicà a Massimo Scaglione, ‘l regista dla vijà fin-a da la prima edission. Anandiasse quasi për azar ant lë dzèmber dël 1998, al Teatro Carignan, la «Vijà piemontèisa», a l’é dventà ant j’ani un randevó ch’a fa tradission, ch’a fa festa, che la gent a speta, come tute le ròbe sempie e bele. Vijà, «veglia», për sente ‘l Natal con le vos dla poesìa e dla mùsica che da sécoj a parla an piemontèis, ch’a veul ‘dcò esse na festa dla speransa, dl’arcòrd, dla continuità e dla arnassensa, sicur che le paròle a son nen mach segn o fià, ma a l’han n’anima e na stòria antica. La plaquetta con ‘l programa e l’antologìa poetica as peul tiresse giù dal sit http://www.studipiemontesi.it. Anformassion : tel. 011/537486; mailto:info@studipiemontesi.it. d'Albina Malerba - da TORINOsette dLa Stampa dij 18 dë dzèmber dël 2015

Indietro