Gir d’Italia con ël bicer an man

La bela idèja ‘d fé ‘n gir ëd Piemont e d’Italia, con ël bicer an man, vis a dì un gir a «scanucé» e a tasté ij vin pì bon e meno avosà, a l’era vnuje a Vittorio Fenocchio, Tòjo Fnoj, e a l’avìa finì cost omagi a un-a dle soe tante passion, ‘l vin, quand l’asar dla vita, dle vite nòste uman-e, a l’ha ciamalo a n’àutr cel, a l’altròve etern. Ma le còse scrite a resto, e soa famija për arcordelo a l’ha realisà un dij tante seugn ëd Tòjo: publiché cost viagi dròlo e amusant, ma da intenditor. Ël lìber adess a l’é surtì e a s’antitola «Gir d’Italia con ël bicer an man/Giro d’Italia con il bicchiere in mano», a l’ha publicalo Presadiretta (marca dl’Editriss Il Punto-Piemonte in Bancarella), con la colaborassion dël Centro Studi Don Minzoni e Ca dë Studi Pinin Pacòt (pp. 157, euro 12); a l’é an piemontèis (un bel piemontèis s-cet e mossant), con la tradussion an italian dacant, e a l’ha na bela e afetuosa prefassion ëd Giovanni Tesio (che già Tòjo a l’avìa fàit a temp a ciameje). Pagine da lese e tasté, nen un repertòri dij vin, ma vin sernù e nasà con «il suo gusto di bon vivant – a scriv Tesio - di gourmet sperimentato, di intenditore sperimentale…è un viaggio lungo d’anni e di ventura…e non ci sono soltanto nomi di vini, ma un’intera esperienza di vita». Un gir ch’a part dal fond, da Pantelerìa, e a riva al capìtol pì bondos, col dij vin ëd soa tèra piemontèisa. A l’é l’ùltim cadò che Tòjo a lassa a j’amis, «soa vos an parla, e an conta, e an veul bin». Alégher! d'Albina Malerba - da TORINOsette dLa Stampa dij 29 ëd gené dël 2016

Indietro