Paròle piemontèise

L’Araba Fenice a publicherà prima dël Salon dël lìber ëd magg un volum ëd litre che Augusto Monti a l’ha mandà për sinquanteses agn a tanti corispondent, a tante përsonalità, da Salvemini a Croce a Gobetti a Bobbio a Einaudi (Luigi e Giulio), ansoma, a ‘n sach d’inteletuaj, professor, òm dë scòla, resistent. Cheidun-a dle litre a son për Arrigo Cajumi e anteresso la tradussion ën piemontèis che Monti a l’era campasse a fé dël «Don Pipeta l’Asilé» ‘d Pietracqua. Ma un-a dle litre pì galupe (a Franco Antonicelli, prim dicember 1963) a parla ‘d serte paròle piemontèise con tan ëd derivassion latin-a. Le paròle a son «porilo», «gnero», «gagno», «vergna». «Porilo» (come «pivela») a mnirìa – secundum Pavese – da «puella» dël latin parlà; «gnero» da «ignarus»; «gagno» da «ganeo», «ganeum» ch’a ven a dì «perdadì»; e peuj «vergna», paròla dle Langhe che noj ciamoma, riferìe a le masnà, «lande», e ch’a mnirìa (Monti a dis «secondo me») dal latin «verna». Tuti termo che ‘l Rep a registra dasand dë spiegassion ch’a contradisso nen cole ‘d Monti. Mach «vergna» a risulta ‘d diversa lession. Ma as peul capisse, përchè ch’as trata – a dì ‘ Monti – ‘d na vos motobin local. Che se peuj nopà ‘ndoma a «landa» («seccatura», «piagnisteo») ‘l novìssim Rep a delud nen (Ël Rep-“Repertorio Etimologico Piemontese”, as presenta ‘l 7 ëd mars ant l’Aula Magna dla Cavallerizza Reale; info: tel. 011/537486). ëd Giovanni Tesio - da TORINOsette dLa Stampa dij 4 ëd mars dël 2016

Indietro