Enrich Eandi

Enrico Eandi a l’era, coma a l’é stàit ricordà con tanta bin e comossion dai sò dipendent, n’imprenditor vajant, giust e antivist ch’a l’ha savù creé e masenté, mersì a soa volontà d’assel, un-a dle asiende pì avansà e avosà ant ël camp dl’informatica, ma a l’é stàit ëdcò un grand piemontèis e un piemontesista franch e s-cèt. Dacant a sò travaj a l’ha sempe goernà e coltivà na passion fòrta e apassionà për la lenga piemontèisa. A l’ha sostnù l’angagi dla Ca dë Studi Piemontèis coma Consijé, e ansema a na soa prima Associassion «La lòsna», a l’ha realisà ant ël 2000 ‘l « Coretor Ortogràfich Piemontèis », ‘l prim për na lenga regional. Për costa soa capacità ‘d vardé sempe un pòch pì anans dj’àutri a l’é ampegnasse për la distribussion sla ragnà dij lìber piemontèis realissand, con la soa «Fundassiun Savej», che antant a l’avìa fondà, un «Portal dl’editoria» ch’a portèissa ant ël mond ij tìtoj piemontèis e an sël Piemont. Dël 2014 a l’é angagiasse con slans përchè Turin a ricordèissa coma as duvìa ij mòrt dël 1864, a 150 ani dlë spostament dla Capital da Turin a Firense, con na publicassion «La strage impunita» (‘d Valerio Monti), con un sit www.torino.1864, che Enrico Eandi a l’ha presentà al Rëscontr, ansema a la Ca dë Studi Piemontèis e al Consèj regional dël Piemont, «1864 e Torino non fu più capitale»; e la sèira dël 22 dë stèmber a l’ha vorsù, finansià e realisà an Piassa San Carlo con la Companìa ‘d Marco Gobetti në spetàcol ch’a resterà ant la stòria dle comemorassion dël 1864. A son mach citassion d’un travaj d’un grand piemontèis ch’i l’oma salutà con magon e arconossensa, ansema ai Sò, ai tanti amis, ai dipendent, na matin frèida e grisa ‘d fin d’invern, compagnà da na reusa bianca. d'Albina Malerba - da TORINOsette dLa Stampa dj'11 ëd mars dël 2016

Indietro