Dame piemontèise e autor provensaj

Ij Trobador provensaj a son stàit j’autor, tra ij sècoj XII e XIII , dle prime canson d’amor scrite ant un dij lengagi che, lassand ël latin, a l’han contribuì a arnové an manera ancreusa la tradission lenghistica e coltural dij pòpoj d’Euròpa. Butandse an tren da soe leuve, costi poeta (quàiche nòm tant për capisse: Raimbaut de Vaqueiras, Peire Ramon de Tolosa, Bertran d’Alamon, Peire Vidal, Albertet de Sisteron, e via fòrt), a son spantiasse da na part vers le region catalan-e e da l’àutr vers ël Piemont. An tèra ‘d Piemont a l’han trovà ospitalità e riguard dai Marchèis dël Monfrà, dai Cont ëd Savòja, dai Marchèis ëd Salusse e ‘d Busca. Parèj pòch për vòta nòm ëd dame piemontèise, coma Beatrice dël Monfrà, o Beatrice ‘d Savòja-Provensa, o Adelaide ‘d Salusse, as treuvo coma dame d’amor ant ij vers dij Trobador. N’arserca portà anans dal professor Marco Piccat ant le biblioteche ’d mesa Euròpa, a l’é adess a disposission, nen mach djë studios, ant le quasi quatsent pagine dl’euvra «Donne piemontesi e corti d’amore. Una raccolta di liriche dell’antica Provenza» (Turin, Centro Studi Piemontesi-Ca dë Studi Piemontèis, 2016, Isbn 978-88-8262-250-3, 27 euro). Dòp n’introdussion ch’a riguarda le «corti», Piccat a smon, për la prima vira presentà an manera completa e bin organisà, le poesìe për le dame «piemontèise», an provensal con tradussion an italian a front. Ël lìber a sarà presentà saba 24 dë stèmber, a sinch e mesa apress mesdì, a Salusse, ant le sale dël Refetòri dël Convent ëd San Giovann (info: www.studipiemontesi.it; info@studipiemontesi.it). d'Albina Malerba - da TORINOsette dLa Stampa dij 16 dë stèmber dël 2016

Indietro